ڈی جی سپورٹس پنجاب خضرافضال چودھری سے ایف آئی ایچ نیشنز کپ ہاکی ٹورنامنٹ کے سلور میڈلسٹ کھلاڑیوں کی ملاقات

بدھ 2 جولائی 2025 22:10

لاہور (اُردو پوائنٹ اخبارتازہ ترین - اے پی پی۔ 02 جولائی2025ء) ڈائریکٹرجنرل سپورٹس پنجاب خضرافضال چودھری سے ایف آئی ایچ نیشنز کپ ہاکی ٹورنامنٹ کے سلور میڈلسٹ کھلاڑیوں نے ملاقات کی ہے۔ بدھ کے روز نیشنل ہاکی سٹیڈیم میں ہونیوالی ملاقات میں ڈائریکٹرسپورٹس راناندیم انجم، ہاکی اولمپئن کاشف شاہ، قومی ہاکی ٹیم کے کھلاڑی ندیم احمد، عبدالمنان اور رضوان علی موجود تھے۔

(جاری ہے)

ڈی جی سپورٹس پنجاب نے اس موقع پر کہا ہے کہ ایف آئی ایچ نیشنز کپ ہاکی ٹورنامنٹ کھیلنے والے کھلاڑیوں نے ملک کا نام روشن کیا ہے،ہمیں اپنے کھلاڑیوں پر فخر ہے، ہاکی کا سنہرا دور واپس آرہا ہے، سپورٹس بورڈ پنجاب ہاکی کی ترقی کیلئے بھرپور اقدامات اٹھارہا ہے،سمر سپورٹس گیمز اور اب سمر سپورٹس کیمپس میں بھی ہاکی کو شامل کیا گیا ہے۔انہوں نے مزید کہا ہے کہ قومی کھیل کی ترقی ہمارا مشن ہے، سپورٹس بورڈپنجاب رانا ظہیر احمد میموریل ہاکی ٹورنامنٹ کیلئے ہرممکن تعاون کرے گا۔

قومی ہاکی کھلاڑیوں نے اس موقع پر کہا کہ ہم پر عزم ہیں کہ آئندہ ہونیوالے ٹورنامنٹس میں بھی عمدہ کارکردگی کا مظاہرہ کریں گے اور پاکستان کیلئے میڈلز جیت کر لائیں گے۔ملاقات کے آخر میں کھلاڑیوں نے ڈی جی سپورٹس پنجاب کے ساتھ گروپ فوٹوز بھی بنوائے۔