کشمور پولیس کا کچے میں آپریشن، 2ماہ قبل اغوا ہونے والا بچہ بازیاب

ہفتہ 5 جولائی 2025 20:05

کشمور (اُردو پوائنٹ اخبارتازہ ترین - این این آئی۔ 05 جولائی2025ء)سندھ کے شہر کشمور میں پولیس نے کچے کے علاقے میں آپریشن کرتے ہوئے ڈاکوئوں کے ہاتھوں 2ماہ قبل اغوا ہونے والے بچے کو بازیاب کرالیا جبکہ مغوی بچے کی بازیابی پر علاقے میں خوشی کی لہر دوڑ گئی۔

(جاری ہے)

تفصیلات کے مطابق تھانہ سٹی کشمور کی حدود ذوالفقار شاہ محلہ سے 2 ماہ قبل اغوا ہونیوالا 9سالہ بچہ احد علی چھجن پولیس کی کامیاب کارروائی کے بعد گہیلپور کے کچے کے علاقے سے بازیاب کرا لیا گیا، آپریشن اے ایس پی کشمور محمد عاشر کی سربراہی میں انجام دیا گیا۔

ایس ایس پی کشمور زبیر نظیر شیخ نے بچے کو بازیابی کے بعد اس کے والدین کے حوالے کر دیا، جذباتی مناظر اس وقت دیکھنے میں آئے جب 2 ماہ بعد احد علی اپنی ماں سے ملا اور بے ساختہ رونے لگا۔بچے کی بازیابی کی اطلاع پر علاقے میں خوشی کی لہر دوڑ گئی، اہل علاقہ نے پولیس کی کوششوں کو سراہا اور ان کے کردار کو سیکیورٹی کے لیے قابلِ تحسین قرار دیا۔پولیس حکام کے مطابق جرائم پیشہ عناصر کے خلاف کارروائیاں آئندہ بھی جاری رہیں گی اور شہریوں کی جان و مال کا تحفظ ہر حال میں یقینی بنایا جائے گا۔