سرفراز احمد کی کپتانی کی صلاحیت بابر ، رضوان، شاہین اور سلمان آغا سے زیادہ تھی : باسط علی

سرفراز نے کبھی اپنے لیے نہیں بلکہ ہمیشہ ٹیم اور ملک کے لیے سوچا اور گراؤنڈ میں بھی اس کا خیال یہی ہوتا تھا : سابق کرکٹر

ذیشان مہتاب پیر 7 جولائی 2025 11:07

سرفراز احمد کی کپتانی کی صلاحیت بابر ، رضوان، شاہین اور سلمان آغا ..

اسلام آباد (اردو پوائنٹ تازہ ترین اخبار ۔ 7 جولائی 2025ء ) قومی کرکٹ ٹیم کے سابق کھلاڑی نے ایک بار پھر سرفراز احمد کی کپتانی کی تعریف کی اور انہیں پاکستان میں کرکٹ کی تاریخ کے کامیاب ترین کپتانوں میں سے ایک قرار دیا ۔

نجی ٹی وی کے پوڈ کاسٹ میں گفتگو کرتے ہوئے سابق کرکٹر اور تجزیہ نگار باسط علی نے کہا کہ سرفراز نے قومی ٹیم کو نمبر ون بنا دیا تھا، پھر بھی اُسے دودھ میں سے مکھی کی طرح سے ہٹا دیا گیا مگر وہ بچہ خاموش رہا۔

باسط علی نے کہا کہ سرفراز بے باک لیڈر تھا اور بابر اعظم جیسے کپتان تو اُس کی جیب میں رہتے تھے، اللہ نے سرفراز کو جو کپتانی کی صلاحیتیں دی تھیں وہ چاہے بابر ہو، رضوان، شاہین یا سلمان علی آغا ، یہ سیفی کے پاس بھی نہیں آتے تھے۔

(جاری ہے)

انہوں نے کہا کہ سرفراز نے کبھی اپنے لیے نہیں بلکہ ہمیشہ ٹیم اور ملک کے لیے سوچا اور گراؤنڈ میں بھی اس کا خیال یہی ہوتا تھا، یہی وجہ ہے کہ چیمپئنز ٹرافی میں اُس نے پانچ نمبر پر بیٹنگ کی تو رنز کیے اور پھر 7ویں نمبر پر کھیلنے آیا تو بھی خود کو اچھا کھلاڑی ثابت کیا۔

باسط علی کا خیال ہے کہ یونس خان، انضمام اور راشد لطیف کی طرح سرفراز احمد بھی کھلاڑیوں کو بنانا جانتا ہے جبکہ یہ صلاحیت رضوان، بابر شاہین اور دیگر لوگوں میں نہیں ہے۔