سندھ حکومت کا لیاری سانحہ کے جاں بحق افراد کے لواحقین کے لیے فی کس 10 لاکھ روپے امداد کا اعلان

پیر 7 جولائی 2025 23:22

کراچی(اُردو پوائنٹ اخبارتازہ ترین - آن لائن۔ 07 جولائی2025ء)کراچی کے علاقے لیاری میں رہائشی عمارت گرنے کے دلخراش واقعے پر صوبائی وزرا نے گہرے دکھ کا اظہار کرتے ہوئے متاثرین کے ساتھ یکجہتی اور ذمہ داروں کے خلاف سخت کارروائی کا اعلان کیا ہے۔وزیر اطلاعات سندھ شرجیل انعام میمن نے واقعے کو افسوسناک قرار دیتے ہوئے کہا کہ لیاری کے متاثرین کے غم میں برابر کے شریک ہیں، واقعے میں 27 قیمتی جانوں کا ضیاع ہوا۔

وزیراعلیٰ سندھ مراد علی شاہ غیر قانونی تعمیرات پر سخت برہم ہیں، اور انہوں نے ملوث افراد کے خلاف ایف آئی آر درج کرانے کا حکم دے دیا ہے۔دوسری جانب صوبائی وزیر سعید غنی نے جاں بحق افراد کے لواحقین کے لیے فی کس 10 لاکھ روپے امداد کا اعلان کرتے ہوئے کہا کہ متاثرین کی مکمل داد رسی کی جائے گی۔

(جاری ہے)

انہوں نے مزید کہا کہ کمشنر کراچی کی سربراہی میں انکوائری کمیٹی قائم کر دی گئی ہے۔

کمیٹی آئندہ 24 گھنٹوں میں خستہ حال 51 عمارتوں کی تفصیلات فراہم کرے گی۔فیکٹ فائنڈنگ رپورٹ دو دن میں مکمل کی جائے گی۔صوبائی وزیر سعید غنی نے کہا کہ ذمہ داروں کے خلاف سخت کارروائی کا فیصلہ کر لیا گیا ہے اور ملوث افسران اور بلڈنگ کنٹرول آفیسرز کو شاملِ تفتیش کیا جائے گا۔سعید غنی نے بتایا کہ کراچی میں 588 عمارتوں کو خطرناک اور سندھ بھر میں 744 عمارتوں کو انتہائی خطرناک قرار دیا گیا ہے۔غیرقانونی تعمیرات کے خلاف سخت قانون سازی کی جا رہی ہے تاکہ مستقبل میں ایسے واقعات کا تدارک کیا جا سکے۔حکام کے مطابق کمشنر کراچی دو ہفتوں میں تمام خطرناک عمارتوں کا سروے مکمل کر کے رپورٹ پیش کریں گے تاکہ فوری طور پر انہدام کا عمل شروع کیا جا سکے۔