کم آمدن والے لوگوں کیلئے ’’احساس اپنا گھر‘‘ اسکیم کا آغاز، بلاسود قرضوں کی فراہمی

پشاور (اُردو پوائنٹ اخبارتازہ ترین - اے پی پی۔ 07 جولائی2025ء) وزیر اعلیٰ خیبر پختونخوا علی امین خان گنڈاپور کی قیادت میں صوبائی حکومت نے ایک اور اہم سنگ میل عبور کر لیا، کم آمدن والے لوگوں کو اپنے گھر تعمیر کرنے کے لئے بلاسود قرضوں کی فراہمی کے لیے’’ احساس اپنا گھر‘‘ اسکیم پر عملدرآمد کا باقاعدہ آغاز ہو گیا ہے۔بلا سودقرضوں کے چیکس تقسیم کرنے کے لئے پیر کے روز وزیر اعلیٰ ہاؤس میں ایک تقریب کا انعقاد کیا گیا جس کے مہمان خصوصی وزیر اعلیٰ علی امین گنڈاپور تھے۔

صوبائی کابینہ اراکین مینا خان آفریدی ، مزمل اسلم، ڈاکٹر امجد، رنگیز احمد کے علاوہ محکمہ ہاؤسنگ کے حکام بھی تقریب میں شریک ہوئے۔اس موقع پر وزیر اعلیٰ نے کامیاب درخواست دہندگان میں بلاسود قرضوں کے چیکس تقسیم کئے۔

(جاری ہے)

احساس اپنا گھر اسکیم کے تحت بلاسود قرضوں کی فراہمی کے لئے چار ارب روپے مختص کئے گئے ہیں۔ قرضوں کی فراہمی کے عمل میں شفافیت کو یقینی بنانے کے لیے کمپیوٹرائزڈ قرعہ اندازی کے ذریعے درخواست دہندگان کا انتخاب کیا گیا۔

اسکیم کے تحت 18سال سے 65 سال تک کی عمر کے وہ افراد قرض لینے کے اہل ہیں جن کی ماہانہ آمدنی ڈیڑھ لاکھ روپے سے کم ہو۔ درخواست گزاروں کو 15 لاکھ روپے تک کے بلا سود قرضے دئیے جارہے ہیں۔ یہ قرضے سات سال کی مدت میں آسان قسطوں میں واپس کرنے ہوں گے۔ اسکیم کے تحت ریوالونگ فنڈ سسٹم کے ذریعے آئندہ سالوں میں بھی قرضے فراہم کئے جائیں گے۔ اسکیم کے پہلے مرحلے کےلئے ایک لاکھ 23 ہزار درخواستیں موصول ہوئی تھیں جن میں سے 18 ہزار 555 اسکیم کی شرائط پر پورا اتری ہیں۔

اسکیم کے تحت آبادی کے تناسب کی بنیاد پر صوبے کے تمام اضلاع میں قرضے دئیے جار ہے ہیں۔ وزیر اعلیٰ نے تقریب سے خطاب کرتے ہوئے کہا کہ احساس اپنا گھر سکیم صوبائی حکومت کا ایک فلیگ شپ اور غریب پرور منصوبہ ہے جو کم آمدنی والے لوگوں کو اپنی چھت فراہم کرنے کے وژن کا حصہ ہے۔ احساس اپنا گھر اسکیم کے عملی اجراءکو ممکن بنانے پر محکمہ ہاؤسنگ اور بینک آف خیبرکے حکام کو خراج تحسین پیش کرتا ہوں۔

صوبے کے عوام کو پیغام دینا چاہتا ہوں کہ صوبے کے معاشی مسائل بہت حد تک حل ہو چکے ہیں، ہماری ٹیم کی انتھک کوششوں سے صوبہ اب معاشی طور پر اپنے پاؤں پر کھڑا ہوگیا ہے۔ ہم مزید اپنے وسائل بڑھائیں گے اور اپنے لوگوں پر خرچ کریں گے، ہر سیکٹر میں لوگوں کو سہولیات فراہم کریں گے اور ان کے مسائل ان کی دہلیز پر حل کریں گے۔ عنقریب ہم مستحق گھرانوں کو سولر سسٹم کی فراہمی کے منصوبے کا بھی اجراءکر رہے ہیں۔

انہوں نے مزید کہا کہ احساس اپنا گھر اور سولر اسکیم میں سو فیصد شفافیت اور میرٹ کو یقینی بنایا گیا ہے۔ میں عوام کا مشکور ہوں کہ انہوں نے اس سلسلے میں کسی سیاسی سفارش کا سہارا نہیں لیا،میں پارلیمنٹیرینز کا بھی مشکور ہوں جنہوں نے اس سلسلے میں تعاون کیا،سفارشی کلچر کی وجہ سے عوام اور حکومت کے درمیان اعتماد کا فقدان ہے، ہم نے عوام کے اعتماد کو بحال کرنے کے لئے سفارش کلچر کا خاتمہ کرنا ہے۔

ہم صوبے کے عوام کو معیاری رہائشی سہولیات کی فراہمی کے لئے متعدد منصوبوں پر کام کر رہے ہیں، نیو پشاور ویلی منصوبے پر پیشرفت تیزی سے جاری ہے، نئے مالی سال کے بجٹ میں صحت، تعلیم، پینے کے پانی اور انفراسٹرکچر اور دیگر شعبوں میں خطیر سرمایہ کاری کریں گے۔تقریب سے خطاب کرتے ہوئے وزیراعلیٰ کے معاون خصوصی برائے ہاؤسنگ امجد علی خان اور سیکرٹری ہاؤسنگ محمود اسلم نے احساس اپنا گھر اسکیم کے مختلف پہلوؤں پر تفصیلی روشنی ڈالی۔