وزیر اعلیٰ خیبر پختونخوا علی امین خان گنڈاپور کی زیر صدارت محکمہ بلدیات کا اہم اجلاس

پشاور(اُردو پوائنٹ اخبارتازہ ترین - آن لائن۔ 08 جولائی2025ء)وزیر اعلیٰ خیبر پختونخوا علی امین خان گنڈاپور کی زیر صدارت محکمہ بلدیات کا اہم اجلاس ہوا۔ متعلقہ اراکین صوبائی کابینہ، چیف سیکرٹری، متعلقہ انتظامی سیکرٹریز اور محکمہ بلدیات کے حکام کی شرکت ہوئی۔ صوبے میں صفائی ستھرائی کے لئے وزیر اعلیٰ علی امین گنڈاپور نے اہم اقدام اٹھاتے ہوئے صوبہ بھر کے دیہات کے ویلج کونسلز میں صفائی ستھرائی کے لئے خصوصی پروگرام شروع کرنے کا فیصلہ کیاگیا۔

یہ بھی فیصلہ ہوا کہ پہلے مرحلے میں صوبے کی 2061 دیہی یونین کونسلز میں یہ پروگرام شروع کیا جائے گا۔اجلاس کو بریفنگ میں بتایاگیا کہ اس پروگرام پر عملدرآمد کے لئے ابتدائی طور پر ساڑھے پانچ ارب روپے کا تخمینہ لگایا گیا ہے۔

(جاری ہے)

یہ فیصلے بھی کئے گئے کہ پروگرام کے تحت ہر یونین کونسل کے لئے چار افراد پر مشتمل صفائی عملہ بھرتی کیا جائے گا،یہ عملہ یومیہ اجرت کی بنیاد پر بھرتی کیا جائے گا۔

اجلاس کو بتایا گیا کہ یومیہ اُجرت پر عملے کی بھرتی کے لئے ایک صاف اور شفاف طریقہ کار وضع کیا جائے گا، یہ عملہ یونین کونسل کی سطح پر گھر گھر جا کر کوڑا کرکٹ اٹھاکر ٹی ایم اے کے کلیکشن پوائنٹ تک پہنچانے کا کام کرے گا، ابتدائی طور پر ہر یونین کونسل میں کوڑا کرکٹ اکٹھا کرنے اور صفائی کے لئے ایک لوڈر گاڑی اور دیگر ضروری سامان فراہم کیا جائے گا، متعلقہ اسسٹنٹ کمشنر، تحصیل میونسپل آفیسر اور اسسٹنٹ ڈائریکٹر لوکل گورنمنٹ پروگرام پر عملدرآمد کی نگرانی کریں گے، پروگرام کو کامیاب بنانے کے لئے منتخب بلدیاتی نمائندوں اور کمیٹی کی شرکت کو یقینی بنایا جائے گا، پروگرام پر عملدرآمد کی نگرانی کے لئے مانیٹرنگ کا ایک مؤثر نظام وضع کیا جائے گا، بریفنگ میں بتایا گیا کہ صوبائی کابینہ کے اگلے اجلاس میں باقاعدہ منظوری کے فوری بعد پروگرام کا عملی اجراء کیا جائے گا، دوسرے مرحلے میں صوبے کی پہاڑی علاقوں کی یونین کونسلز میں یہ پروگرام شروع کیا جائے گا۔

وزیراعلیٰ علی امین گنڈاپورنے کہا کہ یہ پروگرام موجودہ صوبائی حکومت کا ایک سگنیچر پروگرام ہے، صوبے تاریخ میں پہلی دفعہ ہم دیہاتی علاقوں میں سنیٹیشن سروسز کا آغاز کر رہے ہیں، کوشش ہے کہ 14 اگست تک پروگرام کا باضابطہ اجرا کریں۔ علی امین گنڈاپور نے کہا کہ اس پروگرام سے نہ صرف دیہی علاقوں میں صفائی ستھرائی یقینی ہوگی بلکہ ہزاروں لوگوں کو روزگار کے مواقع بھی ملیں گے، پروگرام پر مقررہ ٹائم لائنز کے مطابق عملدرآمد کے لئے ضروری اقدامات کئے جائیں، صفائی عملے کی بھرتی میں مروجہ قواعد و ضوابط پر عملدرآمد اور شفافیت کو ہر لحاظ سے یقینی بنایا جائے، اس پروگرام کو دیر پا بنیادوں پر چلانے کے لئے لائحہ عمل بنایا جائے۔