Live Updates

بالی وڈ اداکار رنبیر کپور کے اثاثوں کی تفصیلات سامنے آگئیں

اس وقت بالی وڈ اداکار بھارتی فلم انڈسٹری کی 1600کروڑ بھارتی روپے کی سب سے بڑے بجٹ کی فلم میں مرکزی کردار ادا کر رہے ہیں

بدھ 9 جولائی 2025 15:01

ممبئی (اُردو پوائنٹ اخبارتازہ ترین - این این آئی۔ 09 جولائی2025ء)بالی وڈ اداکار رنبیر کپور کے اثاثوں کی تفصیلات سامنے آگئیں۔رنبیر کپور کا شمار بالی وڈ کے صف اول کے اداکاروں میں ہوتا ہے، ان کے کیرئیر میں ایک کے بعد ایک ہٹ فلمیں ہیں جن میں عجب پریم کی غضب کہانی، راجنیتی، راک اسٹار، برفی، اے دل ہے مشکل، سنجو سمیت دیگر شامل ہیں۔رنبیر فلموں کا معاوضہ بھی کروڑوں میں وصول کرتے ہیں اور بھارتی میڈیا رپورٹس کے مطابق ایک فلم کیلئے انہوں نے 75کروڑ بھارتی روپے معاوضہ لیا۔

اس وقت بالی وڈ اداکار بھارتی فلم انڈسٹری کی سب سے بڑے بجٹ کی فلم میں مرکزی کردار ادا کر رہے ہیں اور فلم کا بجٹ 1600 کروڑ بھارتی روپے ہے تاہم خود رنبیر کے پاس کتنے اثاثے ہیں اس پر نظر ڈالتے ہیں۔رپورٹس کے مطابق رنبیر کپور کے پاس 345 کروڑ بھارتی روپے مالیت کے اثاثے ہیں اور یہ اثاثے فلموں سے ہی نہیں بلکہ برانڈ انڈوسمنٹ، سرمایہ کاری، رئیل اسٹیٹ سے کمائے ہیں۔

(جاری ہے)

بالی وڈ اداکار 6 کروڑ بھارتی روپے فی برانڈ فیس وصول کرتے ہیں۔ اس کے علاوہ ان کے پاس لگژری گاڑیوں بھی موجود ہیں جن میں 8 کروڑ بھارتی روپے مالیت کی بینٹلی کانٹینینٹل جی ٹی، رینج روور، مرسڈیز اور دیگر موجود ہیں۔رنبیر نے ممبئی میں 250 کروڑ بھارتی روپے مالیت کا کرشنا راج بینگلو لے رکھا ہے۔ اس لے علاوہ 35 کروڑ بھارتی روپے مالیت کا پالی ہل میں اپارٹمنٹ اور پونے ٹرمپ ٹاورز میں 13 کروڑ بھارتی مالیت کا فلیٹ ہے جس سے سالانہ 45 لاکھ بھارتی روپے کرایہ وصول ہوتا ہے۔