ٹریفک پولیس کوہستان اپر کی ٹریفک قوانین کی خلاف ورزی کرنے والوں کے خلاف کارروائیاں جاری، جرمانے عائد

بدھ 9 جولائی 2025 15:26

ایبٹ آباد (اُردو پوائنٹ اخبارتازہ ترین - اے پی پی۔ 09 جولائی2025ء) ٹریفک پولیس کوہستان اپر کی جانب سے ٹریفک قوانین کی خلاف ورزی کرنے والوں کے خلاف بھرپور کارروائیاں جاری ہیں۔ شعبہ اطلاعات و تعلقات عامہ کوہستان اپر پولیس کے مطابق ضلعی پولیس سربراہ فرمان اللّٰہ کی خصوصی ہدایات پر عملدرآمد کرتے ہوئے ڈی ایس پی ہیڈکوارٹر مسعود خان کی زیر نگرانی ٹریفک انچارج کمیلہ عبدالرحیم اور دیگر پولیس عملے نے کمیلا بازار میں ٹریفک قوانین کی خلاف ورزی کرنے والوں کے خلاف بھرپور کارروائی کی۔

کارروائی کے دوران کمسن موٹر سائیکل و گاڑی چلانے والوں، بغیر لائسنس ڈرائیوروں، بغیر رجسٹریشن گاڑیوں، بغیر ہیلمٹ موٹر سائیکل سواروں اور دیگر ٹریفک قوانین کی خلاف ورزی کرنے والوں پر بھاری جرمانے عائد کیے گئے اور متعدد افراد کو وارننگز بھی جاری کی گئیں۔

(جاری ہے)

اس موقع پر ٹریفک پولیس کی جانب سے موجود شہریوں کو ٹریفک قوانین کی آگاہی بھی دی گئی تاکہ آئندہ خلاف ورزیاں کم سے کم ہوں۔

ٹریفک عملے نے والدین سے اپیل کی کہ وہ اپنے کمسن بچوں کو گاڑی یا موٹر سائیکل چلانے کی ہرگز اجازت نہ دیں، یہ نہ صرف قانوناً جرم ہے بلکہ ان کی زندگی کے لیے سنگین خطرہ بھی ہے، والدین کی تھوڑی سی لاپروائی کسی بڑے حادثے کا سبب بن سکتی ہے۔ کوہستان اپر پولیس شہریوں کے جان و مال کے تحفظ، قانون کی پاسداری اور ٹریفک نظم و ضبط کی بہتری کے لیے ہر ممکن اقدامات جاری رکھے گی، عوام سے درخواست ہے کہ وہ قانون نافذ کرنے والے اداروں سے تعاون کریں تاکہ ایک محفوظ اور پرامن معاشرہ تشکیل دیا جا سکے۔