نام نہاد ترقی پذیر بھارت کا ماڈل صرف اشتہارات تک محدود

بدھ 9 جولائی 2025 19:00

نئی دہلی (اُردو پوائنٹ اخبارتازہ ترین - آن لائن۔ 09 جولائی2025ء) نام نہاد ترقی پذیر بھارت کا ماڈل صرف اشتہارات تک محدود ہونے کی حقیقت سب پر آشکار ہو گئی ۔ مودی سرکار کی شائننگ انڈیا مہم، غریبوں کی چھت چھین کر امیروں کے خواب سنوار رہی ہے۔ بی جے پی سرکار کی دہلی میں شہری منصوبہ بندی مکمل طور پر ناکام ہونے کے بعدحکومتی بدنظمی بے نقاب ہوگئی جب کہ مودی حکومت کی ناقص شہری پالیسی کے باعث دہلی جیسے میٹروپولٹن شہر میں بھی شہری محفوظ نہیں ہیں۔

بھارتی ڈیجیٹل نیوز پلیٹ فارم اسکرول ان نے مودی سرکار کی ناقص انتظامیہ کا پول کھول دیا اور کہا کہ جنگپورہ کے مدراسی کیمپ میں مسماری مہم کے تحت 350 سے زائد مکانات خالی کرائے گئے، 155 خاندان اب تک دوبارہ آباد نہیں ہو سکے، بٹلہ ہاؤس میں 100 سے زیادہ مکانات خالی کرا لیے گئے۔

(جاری ہے)

اسکرول ان کے مطابق رہائشیوں کا کہنا ہے کہ انہیں مناسب نوٹس نہیں دیا گیا اور دوبارہ آبادکاری کا بھی کوئی واضح منصوبہ موجود نہیں، بھارت کی شہری آبادی تیزی سے بڑھ رہی ہے جبکہ شہروں کی رہائش و انفراسٹرکچر کی صلاحیت ناکافی ہے۔

غیر رسمی بستیاں شہری آبادی کا تقریباً 17 فیصد حصہ ہیں جو سستی رہائش کی کمی اوردیہی مسائل کی عکاس ہیں، وزارت ہاؤسنگ اور شہری امور کے مطابق شہری غریب آبادی کے لیے 1.8 کروڑ سے زائد رہائشی یونٹس کی کمی ہے، عمل درآمد میں تسلسل نہ ہونے کے باعث شہری غریب آبادی اکثر بغیر متبادل کے بے دخل کر دی جاتی ہے۔ اسکرول ان نے کہا کہ اس بے دخلی کے باعث آمدنی ، تعلیم اور صحت کے مسائل میں نمایاں اضافہ ہو جاتا ہے، متبادل رہائش کے بغیر بے دخلی کا مطلب مودی سرکار کی نظر میں شہروں میں غریبوں کی کوئی جگہ نہیں ہے، بی جے پی کے دور اقتدار میں ترقی کے نام پر امیر دوست پالیسی عملی طور پر غریب دشمن پالیسی بن چکی ہے۔