ٹیکساس‘ ہم آخری شخص کی تلاش تک نہیں رکیں گے، گورنرگریگ ایبٹ

بدھ 9 جولائی 2025 22:05

ٹیکساس (اُردو پوائنٹ اخبارتازہ ترین - آن لائن۔ 09 جولائی2025ء)امریکی ریاست ٹیکساس کے گورنر گریگ ایبٹ نے ہنگامی پریس کانفرنس میں اعلان کیا ہے کہ ہم تب تک نہیں رکیں گے، جب تک آخری لاپتہ شخص کو تلاش نہ کر لیں۔ٹیکساس میں 4 جولائی کو آنے والے تباہ کن سیلاب کے بعد ریسکیو آپریشن پانچویں روز میں داخل ہو گیا ہے۔ سیلاب میں اب تک 109 سے زائد افراد ہلاک جبکہ 173 افراد لاپتہ ہیں۔

گورنر گریگ ایبٹ نے تصدیق کی ہے کہ 109 افراد سے زائد افراد ہلاک ہوچکے ہیں، جن میں 94 ہلاکتیں صرف کیر کاؤنٹی سے ہیں، جبکہ کیر کاؤنٹی میں 161 اور دیگر علاقوں میں 12 افراد لاپتہ ہیں۔ گورنر نے سیلاب سے متاثرہ علاقوں کا فضائی جائزہ بھی لیا اور صورتحال کو ’تاریخی تباہی‘ قرار دیا۔ گواڈیلوپ دریا کی سطح محض 45 منٹ میں 26 فٹ تک بلند ہوئی جو 2 منزلہ عمارت کے برابر ہے۔

(جاری ہے)

کیمپ مسٹک کی 5 بچیاں اور ایک کونسلر اب تک لاپتہ ہیں، جن کے بارے میں گورنر نے کہا ہے کہ یہ سب سے دل شکستہ لمحات ہیں۔ یہ ہماری ذمہ داری ہے کہ ہر لاپتہ کو ڈھونڈ نکالیں، یہ ہمارا پہلا مشن ہے۔دوسری جانب صدر ڈونلڈ ٹرمپ نے وفاقی ایمرجنسی کا اعلان کر دیا ہے جس سے FEMA کی امدادی سرگرمیوں کو تقویت ملے گی۔ ریاستی، وفاقی، اور مقامی ادارے سیکڑوں رضاکاروں کے ساتھ مل کر مسلسل سرچ آپریشن جاری رکھے ہوئے ہیں۔ گورنر نے اعلان کیا ہے کہ 21 جولائی سے شروع ہونے والے خصوصی سیشن میں متاثرین کی بحالی اور مستقبل کی حکمت عملی زیر بحث آئے گی۔ انہوں نے عوام سے اپیل کی ہے کہ اگر کوئی فرد کیر کاؤنٹی میں لاپتہ ہے تو فوری طور پر 830-258-1111 پر اطلاع دیں۔