اوگرا کی جانب سے پاکستان کی آئل سپلائی چین کی ڈیجیٹلائزیشن کے دوسرے مرحلے کا آغاز ہوگیا

بدھ 9 جولائی 2025 20:20

اسلام آباد(اُردو پوائنٹ اخبارتازہ ترین - این این آئی۔ 09 جولائی2025ء) آئل اینڈ گیس ریگولیٹری اتھارٹی (اوگرا) نے ڈیجیٹل تبدیلی کی جانب اپنے سفر کو جاری رکھتے ہوئے پاکستان کی آئل سپلائی چین کو ڈیجیٹل بنانے کے فلیگ شپ منصوبے کے دوسرے مرحلے کا آغاز کر دیا ہے۔یہ جامع ٹریک اینڈ ٹریس سسٹم پنجاب انفارمیشن ٹیکنالوجی بورڈ (پی آئی ٹی بی) کے تعاون سے متعارف کروایا گیا ہے۔

(جاری ہے)

منصوبے کے تحت پیٹرولیم مصنوعات کی ترسیل کے مکمل نظام کو ڈیجیٹل بنایا جا رہا ہے، جس میں ریفائنریوں اور درآمدی ٹرمینلز سے لے کر اسٹوریج ڈپوز، آئل ٹینکرز اور ریٹیل آؤٹ لیٹس تک تمام مراحل شامل ہیں۔نئے نظام میں ای آر پی پلیٹ فارمز، جی پی ایس ٹریکنگ اور مرکزی ڈیش بورڈز کا استعمال کیا جائے گا ، تاکہ ایندھن کی ترسیل کی بروقت نگرانی ممکن ہو، غیر قانونی ڈیکینٹنگ اور اسمگلنگ کی مؤثر طریقے سے روک تھام کی جا سکے۔اس وقت ملک کی 29 سے زائد آئل مارکیٹنگ کمپنیاں (او ایم سیز) ای آر پی سسٹمز پر کام کر رہی ہیں، جبکہ تقریباً 15,000 آئل ٹینکرز پہلے ہی جی پی ایس ٹریکرز سے لیس کیے جا چکے ہیں۔ یہ پیش رفت اس نظام کے ملک گیر نفاذ کے لیے ایک مضبوط اور مستحکم بنیاد فراہم کرتی ہے۔