من مانیاں ختم؛ نجی سکولوں کی فیس و دیگر معاملات بارے نئی گائیڈ لائنز جاری

کسی بھی سکول کو مقررہ فیس سے زائد رقم وصول کرنے کی اجازت نہیں ہوگی، سکول انتظامیہ کسی بھی سرگرمی یا سمر کیمپ کی مد میں اضافی فیس وصول نہیں کرے گی؛ سکول ایجوکیشن اتھارٹی لاہور

ساجد علی جمعرات 10 جولائی 2025 16:38

من مانیاں ختم؛ نجی سکولوں کی فیس و دیگر معاملات بارے نئی گائیڈ لائنز ..

لاہور ( اُردو پوائنٹ اخبارتازہ ترین۔ 10 جولائی 2025ء ) صوبہ پنجاب کے دارالحکومت لاہور میں نجی سکولوں کی فیس اور دیگر معاملات کے بارے نئی گائیڈ لائنز جاری کردی گئیں۔ میڈیا رپورٹس کے مطابق ڈسٹرکٹ سکول ایجوکیشن اتھارٹی لاہور کی جانب سے سخت گائیڈ لائنز جاری کی گئی ہیں، جن کے تحت کسی بھی سکول کو مقررہ فیس سے زائد رقم وصول کرنے کی اجازت نہیں ہوگی، کوئی بھی نجی سکول ٹیوشن فیس سالانہ صرف 5 فیصد تک بڑھا سکے گا، اس سے زائد اضافہ غیر قانونی قرار دے دیا گیا۔

گائیڈلائنز میں کہا گیا ہے کہ سکول انتظامیہ کسی بھی سرگرمی یا سمر کیمپ کی مد میں اضافی فیس وصول نہیں کرے گی اور نہ ہی طلباء کو مخصوص دکانوں سے کتابیں یا کاپیاں خریدنے پر مجبور کیا جائے گا، کوئی بھی نجی سکول طلبہ سے ایڈوانس فیس نہیں لے گا، صرف ماہانہ بنیاد پر فیس وصول کرنے کی اجازت ہوگی اور فیس کی عدم ادائیگی کی صورت میں کسی بھی طالب علم کو سکول سے نکالنے یا تذلیل کا نشانہ بنانے پر سخت کارروائی عمل میں لائی جائے گی۔

(جاری ہے)

سکول ایجوکیشن اتھارٹی نے گائیڈ لائن میں یہ بھی واضح کیا ہے کہ تمام نجی تعلیمی ادارے طلباء کے لیے ایک محفوظ، دوستانہ اور ہراسگی سے پاک ماحول فراہم کرنے کے پابند ہوں گے، سکول انتظامیہ پر لازم ہوگا کہ وہ تعلیمی ماحول کو خوشگوار بنائے اور طلبہ کے حقوق کا تحفظ یقینی بنایا جائے، ڈسٹرکٹ سکول ایجوکیشن اتھارٹی نے تمام نجی سکولوں کے مالکان کو مذکورہ نئی ہدایات پر فوری عملدرآمد کا حکم دیتے ہوئے خلاف ورزی کی صورت میں قانونی کارروائی کی بھی تنبیہ کردی۔