Live Updates

ملکی تاریخ میں پہلی بار ڈرون ٹیکنالوجی کے ذریعے سیلاب متاثرین کی نشاندہی کے بعد کامیاب ریسکیو آپریشن

جھنگ میں سیمی پل بائی پاس اور سرگودھا روڈ سمیت دیگر علاقوں میں ڈرونز کی مدد سے سیلابی ریلے میں پھنسے افراد اور لائیو سٹاک کو تلاش کیا گیا

ساجد علی پیر 1 ستمبر 2025 11:42

لاہور ( اُردو پوائنٹ اخبارتازہ ترین۔ 01 ستمبر 2025ء ) ملکی تاریخ میں پہلی بار ڈرون ٹیکنالوجی کے ذریعے سیلاب متاثرین کی نشاندہی کے بعد کامیاب ریسکیو آپریشن کیا گیا۔ میڈیا رپورٹس کے مطابق سیلاب متاثرین کی نشاندہی کے لیے تھرمل امیجنگ ڈرون ٹیکنالوجی کا کامیاب استعمال کرتے ہوئے دشوار گزار اور دور افتادہ علاقوں میں سیلاب متاثرین کی نشاندہی کے بعد کامیاب ریسکیو آپریشن کیا گیا ہے، اس سلسلے میں جھنگ میں سیمی پل بائی پاس اور سرگودھا روڈ سمیت دیگر علاقوں میں ڈرونز کی مدد سے سیلابی ریلے میں پھنسے افراد اور لائیو اسٹاک کو تلاش کیا گیا، اس دوران تھرمل امیجنگ کیمرے نے پانی میں گھرے 5 افراد اور مویشیوں کی نشاندہی کی۔

(جاری ہے)

بتایا گیا ہے کہ تھرمل امیجنگ ڈرون کیمروں کے ذریعے سیلابی پانی میں گھرے افراد اور مویشیوں کی آسانی سے نشاندہی ممکن ہوئی، سیلاب متاثرین لوکیشن ٹریس کرنے کے بعد ریسکیو ٹیم فوری طور پر سیلاب سے متاثرہ علاقے میں پہنچی جہاں ریسکیو ٹیم نے پانچوں افراد اور مویشیوں کو بحفاظت محفوظ مقام پر منتقل کردیا، علاوہ ازیں چشتیاں کے دریائی بیلٹ میں بھی سیلاب سے متاثرہ علاقوں سے ڈرون کیمروں کے ذریعے متاثرین کی تلاش کی گئی، بہاولنگر کے دریائی بیلٹ کے سیلاب سے متاثرہ علاقوں میں بھی تھرمل امیجنگ ڈرون کیمروں کا استعمال کیا جارہا ہے۔