چیئرمین سی ڈی اے محمد علی رندھاوا کی زیر صدارت سی ڈی اے بورڈ کا اجلاس

اسلام آباد (اُردو پوائنٹ اخبارتازہ ترین - اے پی پی۔ 10 جولائی2025ء) چیئرمین سی ڈی اے اور چیف کمشنر اسلام آباد محمد علی رندھاوا کی زیر صدارت سی ڈی اے بورڈ کا تیرہواں اجلاس سی ڈی اے ہیڈکوارٹرز اسلام آباد میں منعقد ہوا۔ اجلاس میں ممبر ایڈمن و اسٹیٹ طلعت محمود، ممبر فنانس طاہر نعیم، ممبر انوائرمنٹ اسفندیار بلوچ، ممبر پلاننگ ڈاکٹر خالد حفیظ، ممبر انجینئرنگ سید نفاست رضا نے شرکت کی جبکہ پروفیسر ڈاکٹر محمد علی وائس چانسلر پنجاب یونیورسٹی نے بذریعہ زوم لنک شرکت کی ۔

سی ڈی اے بورڈ کے تیرہویں اجلاس میں مختلف ایجنڈا آئٹمز زیر غور لائے گئے ۔اجلاس میں سی ڈی اے کے سیکورٹی ڈائریکٹوریٹ کو جدید خطوط پر استوار کرنے کیلئے اس کی تنظیم نو کرنے کی منظوری دی گئی جس کے تحت سیکورٹی ڈائریکٹوریٹ کی افادیت کو مزید بڑھانے، مانیٹرنگ کا نظام مزید مؤثر اور مربوط بنانے کے ساتھ ساتھ شفافیت، میرٹ اور انٹرنل اکائونٹیبلٹی کے نظام کو بہتر بنانے میں مدد ملے گی۔

(جاری ہے)

سی ڈی اے بورڈ کے تیرہویں اجلاس میں انفورسمنٹ ڈائریکٹوریٹ کی بھی تنظیم نو کرنے کا فیصلہ کیا گیا جس کے تحت اسلام آباد سے غیر قانونی تجاوزات، تعمیرات کا مکمل خاتمہ کرنے کے ساتھ ساتھ اسلام آباد کو کلین، گرین اور خوبصورت شہر بنانے میں مدد ملے گی۔سی ڈی اے بورڈ کے اجلاس میں سی ڈی اے کے نان گزٹیڈ ملازمین کی ترقی کیلئے مروجہ معیار میں ترمیم کی منظوری دی گئی۔

اجلاس میں سی ڈی اے ہسپتال کے پراجیکٹ ملازمین کی مدت ملازمت میں توسیع کے حوالے سے کمیٹی قائم کرنے کی منظوری دی گئی جو قانون کے ان کی مدت ملازمت میں توسیع کے حوالے سے تمام پہلوؤں کا جائزہ لے کر اپنی سفارشات مرتب کرے گی جن کی روشنی میں توسیع کا حتمی فیصلہ کیا جائے گا۔اجلاس میں میٹرو اور الیکٹرک بسسز کے آپریشن کے مزید موثر بنانے کے حوالے سے بریفنگ دی گئی۔

اجلاس میں فیصلہ کیا گیا کہ الیکڑک بسوں کے آپریشنز کو مزید بہتر بنانے کے ساتھ ساتھ تھرڈ پارٹی ایلویلشن بھی کی جائے تاکہ الیکٹرک بسوں کے آپرشنز کو مزید موثر بنانے میں مدد ملنے کے علاوہ مسافروں کیلئے ای ٹکٹنگ اور اے آئی بیسڈ انٹیگریٹڈ نظام بھی متعارف کرانے میں مدد ملے گی۔چیئرمین سی ڈی اے اور چیف کمشنر اسلام آباد محمد علی رندھاوا نے کہا کہ اسلام آباد کی تعمیر و ترقی اور خوشحالی سی ڈی اے کی اولین ترجیح ہے۔

سی ڈی اے اسلام آباد میں جہاں مختلف سیکٹرز میں ترقیاتی کام کرا رہا ہے وہاں عوام کی رہائشی ضرویات کو پورا کرنے کے لئے بھی اقدامات اٹھارہا ہے۔ اس کے علاوہ اسلام آباد میں ماحول کی بہتری خصوصاً ماحول دوست پودے اور درخت لگانے کے علاوہ شہر میں پارکس اور گراؤنڈ کی اپ لفٹنگنگ کا عمل بھی جاری ہے۔ مزید برآں سی ڈی اے اپنے ذرائع سے حاصل کردہ فنڈز ترقیاتی منصوبوں پر خرچ کررہا ہے تاکہ اسلام آباد کو ایک مثالی دارالحکومت بنانے میں مدد مل سکے۔