Live Updates

مون سون میں ممکنہ بارشوں کے سلسلہ میں واسا راولپنڈی ہائی الرٹ ہے،ایم ڈی واسا

جمعرات 10 جولائی 2025 22:40

راولپنڈی (اُردو پوائنٹ اخبارتازہ ترین - اے پی پی۔ 10 جولائی2025ء) ایم ڈی واسا محمد سلیم اشرف نے کہاکہ محکمہ موسمیات کی پشین گوئی پر واسا راولپنڈی ہائی الرٹ ہے اور رین ایمرجنسی نافذ ہے۔ نشیبی علاقوں میں عملہ ہیوی مشینری کے ساتھ تعینات ہے۔انڈر پاس کمیٹی چوک اور مری روڈ پر بارش شروع ہوتے ہی ہیوی مشینری پہنچا دی گئی۔ جڑواں شہروں میں مون سون بارشوں کا سلسلہ جاری ہے۔

(جاری ہے)

محکمہ موسمیات کے مطابق سیدپور کے مقام پر 7 ملی میٹر، گولڑہ کے مقام پر 8 ملی میٹر، بوکڑہ مقام پر 5 ملی میٹر، پی ایم ڈی 9 ملی میٹر، شمس آباد 3 ملی میٹر جبکہ پیر ودھائی میں 12 ملی میٹر بارش ریکارڈ کی گئی۔ حالیہ بارشوں سے راول ڈیم اور خان پور ڈیم میں پانی کا لیول بڑھ گیا ہے۔ مون سون بارشوں سے پینے کے صاف پانی کی فراہمی میں بہتری آئی ہے۔ نالہ لئی اور نالوں کی بروقت بھل صفائی کروائی گئی ہے۔ شہر بھر کے نالوں اور نالہ لئی کی مانیٹرنگ کی جارہی ہے تاہم ابھی نالہ لئی میں پانی کا بہاؤ معمول کے مطابق ہے۔ نالہ میں کٹاریاں کے مقام پر 5 فٹ جبکہ گوالمنڈی پل پر 4 فٹ ہے۔ کسی بھی قسم کی ایمرجنسی سے نپٹنے کیلئے تیار ہیں۔