ایران کے پاس اپنے دفاع کیلئے ضروری صلاحیتیں موجود ہیں،محمد مہدی ایمانی پور

جمعرات 10 جولائی 2025 23:50

لاہور (اُردو پوائنٹ اخبارتازہ ترین - اے پی پی۔ 10 جولائی2025ء) اسلامی جمہوری ایران کی کونسل برائے بین المذاہب مکالمہ کے چیئرمین محمد مہدی ایمانی پورنے واضح کیا ہے کہ اسلامی جمہوریہ ایران کے پاس اپنے دفاع کیلئے ضروری صلاحیتیں موجود ہیں ۔خانہ فرہنگ اسلامی جمہوری ایران لاہور سے جاری پریس ریلیز کے مطابق ڈائریکٹر جنرل خانہ فرہنگ لاہور ڈاکٹر اصغر مسعودی سے گفتگو کرتے ہوئے محمد مہدی ایمانی پور نے کہا کہ ایران نے مذہبی اور انسانی معیارات کے دائرے میں رہتے ہوئے خیر سگالی کا مظاہرہ کیا ہے۔

محمد مہدی ایمانی پور نے کہاکہ بدامنی کے حالات میں دنیا بھر کے مذہبی حکام اور مفکرین جو بین الاقوامی امن و سلامتی کے بارے میں فکر مند ہیں،ان سے توقع کی جاتی ہے کہ وہ اسرائیل کی مجرمانہ جارحیت کی فوری مذمت کریں اور اس خطرناک مہم جوئی کا مقابلہ کرنے کے لیے فوری اور اجتماعی اقدام کریں جس نے بلاشبہ عالمی امن و سلامتی کو ایک بے مثال خطرے سے دوچار کر دیا ہے۔

(جاری ہے)

انہوں نے کہا کہ دنیا نے صیہونی حکومت کے اسلامی جمہوریہ ایران کی جغرافیائی سالمیت اور قومی خود مختاری کو پامال کرنے کا مشاہدہ کیا ہے۔غاصب ناجائز ریاست نے رہائشی علاقوں، ایٹمی سائنسدانوں اور اعلی فوجی حکام کے گھروں ، معصوم بچوں اور عورتوں پر حملے اور وحشیانہ قتل عام کیا ہے۔صیہونی حکومت کا یہ جرم نہ صرف اقوام متحدہ کے چارٹر کی شقوں کی خلاف ورزی ہے بلکہ ایران کے خلاف واضح جارحیت بھی ہے،یہ کوئی ایسا مسئلہ نہیں ہے جس پر خاموشی اختیار کی جائے۔