اٹک ،ڈینگی کے خاتمے کے لیے مربوط اقدامات ناگزیر ہیں، تمام ادارے اپنا کردار ادا کریں، ایڈیشنل ڈپٹی کمشنر جنرل

جمعہ 11 جولائی 2025 14:20

اٹک (اُردو پوائنٹ اخبارتازہ ترین - اے پی پی۔ 11 جولائی2025ء) انسداد ڈینگی مہم کے سلسلے میں ایک اہم اجلاس ڈپٹی کمشنر آفس اٹک میں منعقد ہوا، جس کی صدارت ایڈیشنل ڈپٹی کمشنر جنرل اٹک انیل سعید نے کی۔ اجلاس میں محکمہ صحت، تعلیم، ڈی ڈی ایچ اوز اور دیگر متعلقہ افسران نے شرکت کی اور انسداد ڈینگی کے حوالے سے تفصیلی بریفنگ دی۔اجلاس سے خطاب کرتے ہوئے اے ڈی سی جی انیل سعید نے تمام اداروں کو ہدایت کی کہ انسداد ڈینگی مہم میں بھرپور شرکت یقینی بنائیں۔

انہوں نے کہا کہ ضلعی و تحصیل انتظامیہ، سرکاری ادارے بالخصوص محکمہ صحت ڈینگی کے مکمل خاتمے کے لیے مؤثر اقدامات اٹھائیں اور دیگر محکمے بھی اس سلسلے میں بھرپور معاونت فراہم کریں۔انہوں نے مزید بتایا کہ انسداد ڈینگی مہم کی نگرانی تیسری پارٹی کے ذریعے کی جا رہی ہے اور محکموں کی کارکردگی سے متعلق رپورٹس اعلیٰ حکام کو ارسال کی جا رہی ہیں۔

(جاری ہے)

انیل سعید نے ضلعی محکموں کو اپنی کارکردگی مزید بہتر بنانے اور اپنے سرکاری دفاتر میں ڈینگی سے بچاؤ کے ضابطہ اخلاق پر سختی سے عملدرآمد کی ہدایت بھی کی۔انہوں نے عوام سے اپیل کی کہ وہ اپنے اردگرد کے ماحول کو صاف اور خشک رکھیں تاکہ ڈینگی جیسے مہلک مرض سے بچا جا سکے۔ اجلاس میں شریک افسران نے بھی بھرپور تعاون کی یقین دہانی کروائی۔\378