Live Updates

صوبہ کے مختلف علاقوںمیں ایک منظم گروہ 132Kvٹرانسمیشن لائن سے کنڈکٹرزکے سپین اورٹاورز کے بریس پٹی چوری نکال کر چوری کررہے ہیں،کیسکو

جمعہ 11 جولائی 2025 18:33

کوئٹہ (اُردو پوائنٹ اخبارتازہ ترین - آن لائن۔ 11 جولائی2025ء) کوئٹہ الیکٹرک سپلائی کمپنی(کیسکو)کے ترجمان نے کہاہے کہ صوبہ کے مختلف علاقوںمیں ایک منظم گروہ 132Kvٹرانسمیشن لائن سے کنڈکٹرزکے سپین اورٹاورز کے بریس پٹی چوری نکال کر چوری کررہے ہیں۔ ترجمان نے کہاکہ 9جولائی کو بارش اور طوفانی ہوائوں کے نتیجے میں 132KVسوراب۔خضدارٹرانسمیشن لائن کے 7 ٹاورز گرگئے تھے اورخضدارکے علاقہ میں 10جولائی کی رات 12بجے کے قریب مذکورہ ٹرانسمیشن لائن کے گرے ہوئے ٹاورز سے چارافرادبریس اور پٹیاں چوری کررہے تھے کہ اس دوران مقامی چوکیدارنے پولیس کواطلاع دی۔

ترجمان نے مزیدکہاکہ پولیس تھانہ صدر خضدار کے ایس ایچ او اپنے عملہ کے ہمراہ جائے وقوعہ (جعفرآباد) پہنچ گئے اورانہوںنے اس موقع پر 2اشخاص بنام محمدعمرولد عبدالحفیظ اور محمدانورولد دُرمحمد ساکن کھٹان ضلع خضداربمعہ 2عدد موٹرسائیکل اورٹاورزکے بریس پٹیوں کے ساتھ رنگے ہاتھوںگرفتار کر لئے جن کے خلاف مزیدقانونی کارروائی عمل میں لائی جارہی ہے۔

(جاری ہے)

تاہم اس موقع پر مذکورہ گروہ کے 2افراد فرارہونے میں کامیاب ہوگئے جن کی تلاش جاری ہے۔ واضح رہے کہ 132Kvٹرانسمیشن لائن کے ٹاورز سے بریس پٹی نکالنے اور کنڈکٹرز چوری کرنے کے واقعات سے نہ صرف بجلی کی فراہمی میں تعطل پیداہوتاہے بلکہ ٹرانسمیشن لائن کے گرنے کابھی خدشہ رہتاہے۔جس سے کیسکوکو مالی نقصان بھی پہنچ رہاہے ۔کیسکونے تمام صارفین سے اپیل کی ہے کہ وہ برقی تنصیبات اور ٹرانسمیشن لائنز سے سامان چوری کرنے والے گروہ کی نشاندہی کریں اور اس قومی اثاثے کی حفاظت کو یقینی بنانے کیلئے کیسکوکے ساتھ تعاون کریں۔