سپیکرقومی اسمبلی کی بے گناہ مسافروں پربھارتی سپانسرڈ دہشتگردوں کے حملے کی مذمت

جمعہ 11 جولائی 2025 20:38

اسلام آباد (اُردو پوائنٹ اخبارتازہ ترین - این این آئی۔ 11 جولائی2025ء)اسپیکر قومی اسمبلی سردار ایاز صادق نے لورالائی اور موسی خیل کے قریب بے گناہ مسافروں پر بھارتی سپانسرڈ دہشتگردوں کے حملے کی شدید مذمت کرتے ہوئے کہاہے کہ قوم بھارتی سرپرستی میں ہونے والی ہر سازش کو ناکام بنانے کیلئے متحد ہے۔ اپنے بیان میں سر دار ایاز صادق نے دہشتگردی کا نشانہ بننے والے افراد کے لواحقین سے دلی ہمدردی اور تعزیت کا اظہار کیا اور کہاکہ شہداء کے اہلخانہ کے دکھ میں برابر کے شریک ہیں۔

انہوںنے کہاکہ معصوم شہریوں پر حملہ انسانیت سوز بربریت کی بدترین مثال ہے، دہشتگرد عناصر قومی وحدت اور امن کو نقصان پہنچانا چاہتے ہیں۔اسپیکر سردار ایاز صادق نے کہاکہ قوم بھارتی سرپرستی میں ہونے والی ہر سازش کو ناکام بنانے کیلئے متحد ہے۔

(جاری ہے)

انہوںنے کہاکہ دہشتگردوں اور ان کے سہولت کاروں کو قانون کے کٹہرے میں لایا جائے گا۔اسپیکر قومی اسمبلی نے شہداء کے خاندانوں کے ساتھ اظہار یکجہتی کیا اورکہاکہ پارلیمان دہشتگردی کے خلاف افواج اور سیکیورٹی اداروں کے ساتھ کھڑی ہے۔ انہوںنے کہاکہ سیکیورٹی فورسز بھارتی اسپانسرڈ دہشتگردوں کے خاتمے میں ضرور کامیاب ہونگے۔اسپیکر نے شہداء کے درجات کی بلندی اور سوگوار خاندانوں کیلئے صبر جمیل کی دعا ء کی