"پہلے پیاس سے مارو، پھر پانی میں ڈبو دو"

لاہور(اُردو پوائنٹ اخبارتازہ ترین۔ یکم ستمبر2025ء) "پہلے پیاس سے مارو، پھر پانی میں ڈبو دو" ، بھارتی میڈیا کی شرمناک حرکتیں، پاکستان میں سیلاب کی تباہ کاری پر جشن منانا شروع کر دیا۔ تفصیلات کے مطابق پاکستان کے ہاتھوں مئی کے ماہ میں ہونے والی جنگ کے دوران عبرت ناک شکست کھانے والا بھارت مکمل طور پر حواس باختہ ہو گیا ہے۔ پاکستان سے جنگ اور سفارتی محاذ پر مسلسل مار کھانے والے بھارت نے اب پاکستان میں سیلاب کی تباہی پر خوشیاں منا کر ایک مرتبہ پھر دنیا کو اپنا گھناونا اور شرمناک چہرہ عیاں کر دیا۔

بھارتی میڈیا کی جانب سے پاکستان میں سیلاب کی تباہی پر خوشیاں مناتے ہوئے کہا جا رہا ہے کہ "انہیں پہلے پیاس سے مارو، پھر پانی میں ڈبو دو، ان کیساتھ ایسا ہی کرنا چاہیئے" ۔

(جاری ہے)

دوسری جانب بھارت کی جانب سے دریائے چناب میں پھر سے 8 لاکھ کوسک پانی بغیر اطلاع چھوڑ دیا گیا جس کے باعث پنجاب ہیڈ مرالہ کے مقام پر بڑے سیلاب کا خدشہ پیدا ہوگیا۔

ذرائع کے مطابق بھارت نے سلال ڈیم کے تمام گیٹ کھول دیے اور پانی چھوڑنے کی باضابطہ اطلاع نہیں دی گئی۔ دریائے چناب میں ہیڈ مرالہ کے مقام پر دریا اس وقت معمول کے مطابق بہہ رہا ہے لیکن اب ایک مرتبہ پھر ہیڈ مرالہ کے مقام پر بڑے سیلاب کا خدشہ ہے۔ ذرائع ایریگیشن حکام کے مطابق بھارت کی جانب سے سلال ڈیم کے گیٹ کھولنے سے 8 لاکھ کیوسک کا سیلابی ریلا پاکستان پہنچے گا۔

بھارت نے چند روز قبل بھی 9 لاکھ کیوسک کا سلابی ریلا چھوڑا تھا۔ پنجاب کے تین بڑے دریاؤں راوی، چناب اور ستلج میں سیلاب سے پہلے ہی صورتحال سنگین ہے جس کے سبب ہزاروں دیہات زیر آب ہیں۔ سیلاب سے سیکڑوں مویشی ہلاک اور کھڑی فصلیں تباہ ہوگئیں جبکہ مختلف حادثات میں 38 افراد موت کے منہ میں چلے گئے۔ دریائے راوی میں پانی کے بہاؤ میں اضافے کے بعد لاہور کے علاقے شاہدرہ سے متصل علاقوں اور شہر کے مضافاتی علاقوں میں سیلابی پانی داخل ہوا جس سے کافی مالی نقصان اٹھانا پڑا۔

ترجمان پی ڈی ایم اے کے مطابق بھارت کی جانب سے ہریکے میں اونچے درجے کے سیلاب کا الرٹ جاری کیا گیا ہے۔ ترجمان کے مطابق آج کے دن آفیشل ذرائع سے ستلج ہریکے کے مقام پر اونچے درجے کے سیلاب کی وارننگ ملی ہے تاہم دریائے چناب یا دیگر دریاؤں میں پانی چھوڑے جانے کی کوئی آفیشل وارننگ ابھی تک نہیں ملی جبکہ سلال ڈیم کے اسپیل ویز کھولے جانے کی بھی کوئی آفیشل انفارمیشن شیئر نہیں کی گئی۔

وزیر اعلیٰ پنجاب کی ہدایات کے پیش نظر سول انتظامیہ اور متعلقہ ادارے ہائی الرٹ ہیں۔ پی ڈی ایم اے پنجاب ارسا اور محکمہ آبپاشی دریاؤں کی صورتحال کو 24 گھنٹے مانیٹر کر رہے ہیں۔ دریاؤں میں کسی بھی بڑے ریلے کے بارے انتظامیہ اور شہریوں کو پیشگی الرٹ جاری کیا جائے گا۔ وزیر اعلیٰ پنجاب نے متعلقہ اضلاع کی انتظامیہ اور دیگر متعلقہ محکموں کو ہائی الرٹ رہنے کی ہدایات جاری کی ہیں۔