Live Updates

پی ٹی آئی ارکان کو کہیں گے کہ وہ قائمہ کمیٹیوں سے استعفے نہ دیں

ابھی چند ہی استعفے مجھ تک پہنچے ہیں، استعفوں کے معاملے پر کوئی جلد بازی نہیں کی، کوشش کریں گے کہ پی ٹی آئی ارکان کمیٹیوں سے استعفے واپس لے لیں۔ اسپیکر قومی اسمبلی ایاز صادق

ثنااللہ ناگرہ پیر 1 ستمبر 2025 21:37

پی ٹی آئی ارکان کو کہیں گے کہ وہ قائمہ کمیٹیوں سے استعفے نہ دیں

اسلام آباد ( اردوپوائنٹ اخبار تازہ ترین۔ آئی پی اے ۔یکم ستمبر 2025ء ) اسپیکر قومی اسمبلی ایاز صادق نے کہا ہے کہ پی ٹی آئی ارکان کو کہیں گے کہ وہ قائمہ کمیٹیوں سے استعفے نہ دیں، ابھی چند ہی استعفے مجھ تک پہنچے ہیں۔انہوں نے میڈیا کے ایک سوال ’تحریک انصاف کی قائمہ کمیٹیوں کے استعفوں پر کیا فیصلہ ہوگا؟‘کے جواب میں اسپیکر اسمبلی نے کہا کہ ابھی سب کے استعفے نہیں ، چند ہی مجھ تک پہنچے ہیں، استعفوں کے معاملے پر کوئی جلد بازی نہیں کی۔

ہم ارکان اسمبلی کو کہتے ہیں کہ پارلیمان میں مثبت کردار ادا کریں، کوشش کریں گے کہ پی ٹی آئی کمیٹیوں سے استعفے واپس لیں، استعفوں کے معاملے پر کوئی جلد بازی نہیں اس پر مشاورت ہوگی۔ پی ٹی آئی ارکان کو کہیں گے کہ وہ ادستعفے نہ دیں، تمام فیصلے مکمل مشاورت سے ہوں گے۔

(جاری ہے)

دوسری جانب پاکستان تحریک انصاف کے چیئرمین بیرسٹر گوہر نے کہا ہے کہ آئندہ سے ہم قومی اسمبلی کے اجلاس میں شرکت کے بجائے احتجاج کرتے ہوئے بائیکاٹ کریں گے۔

دیگر ارکان پارلیمنٹ کے ہمراہ میڈیا سے گفتگو کرتے ہوئے انہوں نے کہا کہ آج تحریک انصاف کی پارلیمانی پارٹی کا اجلاس کے پی ہاؤس میں ہوا، پارلیمانی پارٹی کے ارکان کو بانی پی ٹی آئی کے احکامات پڑھ کر سنائے گئے، پارلیمانی پارٹی کے ارکان نے خان کے احکامات کو درست قرار دیا، پارلیمانی پارٹی نے شہدا کے درجات کیلئے خصوصی دعا کی ہے ہم آئندہ قومی اسمبلی کے اجلاس میں شرکت کے بجائے احتجاج کرتے ہوئے بائیکاٹ کریں گے۔

انہوں نے کہا کہ ہمارے ارکان قومی اسمبلی سے مختلف بہانوں کے ذریعے نشستیں چھینی گئیں، ہمارے ارکان کو نااہل کیا گیا اور ہمیں بولنے کی بھی اجازت نہیں دی جاتی، ہم جشن آزادی اگر منانا چاہیں تو وہ بھی منانے نہیں دیتے، ہم بیشمار مشکلات کے باوجود ایوان میں حاضر ہوئے ہم نے اسمبلی اجلاس میں اپنے مطالبات کو جمہوری انداز میں پیش کرنے کی کوشش کی مگر ہمیں بولنے کی اجازت نہیں دی جاتی۔

اسد قیصر نے کہا کہ کے پی حکومت سیلاب زدگان کے لیے کام کر رہی ہے، ہم بانی پی ٹی آئی سے درخواست کریں کہ وہ سیلاب متاثرین کے لیے فنڈ کی اپیل بھی کریں، ہم اپنی قوم سے یہ امید رکھتے ہیں کہ اس مشکل وقت میں لوگوں کے دکھ درد میں برابر کے شریک ہوں، پنجاب اور خیبر پختونخوا میں سیلابی صورتحال ہے اور ان علاقوں میں بیماریاں بھی ہونگی ہم اقوام متحدہ سے بھی اپیل کریں گے وہ سیلاب متاثرین کے لیے امداد کریں۔