کراچی میں ڈمپرجلانے کے مقدمے کی سماعت ایک بار پھر مؤخر

کیس کی آئندہ سماعت 15 جولائی مقرر، آفاق احمد و دیگر کے خلاف لانڈھی تھانے میں مقدمہ درج ہے

جمعہ 11 جولائی 2025 22:06

کراچی(اُردو پوائنٹ اخبارتازہ ترین - آن لائن۔ 11 جولائی2025ء)انسداد دہشت گردی عدالت کراچی میں ڈمپر جلانے کے مقدمے کی سماعت ایک بار پھر مؤخر کر دی گئی۔ عدالت نے کیس کی مزید سماعت 15 جولائی تک ملتوی کر دی۔سماعت کے دوران مہاجر قومی موومنٹ کے چیئرمین آفاق احمد اور دیگر 12 ملزمان عدالت میں پیش ہوئے۔ کیس میں آفاق احمد اور ان کے ساتھیوں پر الزام ہے کہ انہوں نے ایک کنٹینر کو نذرِ آتش کرنے کی منصوبہ بندی کی اور اسے عملی جامہ پہنایا۔

(جاری ہے)

استغاثہ کے مطابق ملزمان نے عدالت میں تسلیم کیا ہے کہ کنٹینر جلانے کا حکم آفاق احمد نے دیا تھا۔ آفاق احمد پر مزید الزام ہے کہ انہوں نے آڈیو میسج کے ذریعے اپنے کارکنوں کو اکسانے کی کوشش کی، جس کے نتیجے میں کنٹینر کو آگ لگا دی گئی۔متاثرہ کنٹینر سے چینی کی بوریاں چوری ہونے کی بھی اطلاعات ہیں۔ واقعے کے بعد لانڈھی تھانے میں مقدمہ درج کیا گیا، جس میں دہشت گردی، جلاؤ گھیراؤ اور لوٹ مار کی دفعات شامل کی گئی ہیں۔عدالت نے اس موقع پر آفاق احمد اور دیگر ملزمان پر فرد جرم عائد کرنے کی کارروائی ایک بار پھر مؤخر کرتے ہوئے کیس کی آئندہ سماعت 15 جولائی کو مقرر کر دی۔ آفاق احمد و دیگر کے خلاف لانڈھی تھانے میں مقدمہ درج ہے۔