بٹ خیلہ دریائے سوات میں ڈوبنے والے مدرسے کے دو طلباء کی لاشیں نکال لی گئی

جمعہ 11 جولائی 2025 22:40

ملاکنڈ(اُردو پوائنٹ اخبارتازہ ترین - آن لائن۔ 11 جولائی2025ء)ملاکنڈ میں بٹ خیلہ دریائے سوات میں ڈوبنے والے مدرسے کے دو طلباء کی لاشیں نکال لی گئی ہیں۔ دونوں کی شناخت ارشاد عمر اور اعجاز عمر کے نام سے ہوئی ہے اور اپر دیر کے رہائشی تھے۔ملاکنڈ میں بٹ خیلہ ہیڈ ورکس کے مقام پر دریائے سوات میں ڈوب کر جاں بحق ہونے والے دو بچوں کی لاشیں نکال لی گئی ہیں۔

ریسکیو 1122 کے مطابق، دونوں کی شناخت سولہ سالہ ارشاد عمر اور چودہ سالہ اعجاز عمر کے ناموں سے ہوئی ہے۔

(جاری ہے)

دونوں اپر دیر کے رہائشی تھے اور مقامی مدرسہ میں زیرتعلیم تھے۔یہ حادثہ اس وقت پیش آیا جب دونوں بچے دریائے سوات میں کپڑے دھو رہے تھے۔ اچانک دونوں دریا میں گرگئے۔ مقامی افراد نے انہیں بچانے کے لیے فوری طور پر دریا میں چھلانگ لگائی تاہم انہیں بچا نہیں سکے۔مقامی رضاکاروں، ریسکیو 1122 کی غوطہ خور ٹیم اور سول ڈفنس کی ٹیم کے سرچ آپریشن میں دونوں کی لاشیں نکال لی گئیں۔ضلعی انتظامیہ کی طرف سے نہروں اور دریاؤں میں نہانے پر پابندی عائد ہے تاہم دفعہ ایک سو چوالیس کی خلاف ورزی معمول ہے۔