لیاری سانحہ؛ رہائشی عمارت زمین بوس ہونے کے معاملے میں 14 افراد قصوروار قرار

عمارت خستہ حال ہونے سے متعلق ایس بی سی اے افسران کو 2022 سے علم تھا، رپورٹ

جمعہ 11 جولائی 2025 20:45

کراچی(اُردو پوائنٹ اخبارتازہ ترین - این این آئی۔ 11 جولائی2025ء)لیاری کے علاقے بفدادی میں 5 منزلہ رہائشی عمارت کے زمین بوس ہونے کے معاملے میں پولیس نے ایس بی سی اے کے 6 ڈائریکٹرز اور مالک سمیت 14 افراد کو قصور وار قرار دیا ہے۔پولیس کی جانب سے جوڈیشل مجسٹریٹ ساتھ کلثوم سہتو کی عدالت میں عمارت گرنے سے 27 افراد کے جاں بحق ہونے کے مقدمے کی ابتدائی اطلاعی رپورٹ جمع کرادی گئی ہے۔

اطلاعی رپورٹ میں کہا گیا ہے کہ مقدمہ لوکل گورنمنٹ ہاسنگ ٹان پلاننگ ڈپارٹمنٹ سندھ کے افسر کی مدعیت میں درج کیا گیا ہے۔

(جاری ہے)

رپورٹ کی تفصیلات کے مطابق 1986 میں مالک نے 2 حصوں پر مشتمل گرانڈ پلس 5 کی عمارت تعمیر کی تھی۔ کافی عرصے سے دونوں حصے خستہ حال اور ناقابل رہائش تھے۔ 20 فلیٹ پر مشتمل ایک حصہ ایس بی سی اے کی غفلت کے باعث زمین بوس ہوا ہے۔ اس حادثے میں مرد، خواتین اور بچوں سمیت 27 افراد جاں بحق اور 4 افراد زخمی ہوئے۔ رپورٹ میں کہا گیا ہے کہ عمارت خستہ حال ہونے سے متعلق ایس بی سی اے افسران کو 2022 سے علم تھا۔ معلوم ہونے کے باوجود ایس بی سی اے افسران نے اقدامات نہیں کیے۔ افسران نے غفلت، لاپرواہی کا مظاہرہ کیا، جس سے عمارت زمین بوس ہوئی۔