Live Updates

سعودی عرب و فرانس کی مشترکہ صدارت میں فلسطینی ریاست کے قیام بارے بین الااقوامی کانفرنس 28 اور 29 جولائی کو ہوگی

ہفتہ 12 جولائی 2025 10:10

ریاض (اُردو پوائنٹ اخبارتازہ ترین - اے پی پی۔ 12 جولائی2025ء) سعودی عرب اور فرانس کی مشترکہ صدارت میں فلسطینی ریاست کے قیام بارے بین الااقوامی کانفرنس 28 اور 29 جولائی کو ہوگی، اسے قبل ازیں منسوخ کردیا گیا تھا۔ عرب نیوز نے سفارتکاروں کے حوالے سے بتایا کہ دو ریاستی حل کے لیے وزارتی کانفرنس 28 اور 29 جولائی کو ہوگی جس کی تفصیلات جلد ہی شیئر کی جائیں گی، یواین جنرل اسمبلی کی جانب سے طلب کردہ کانفرنس نیو یارک میں اقوام متحدہ کے صدر دفتر میں ہو گی جس کا مقصد فوری طور پر ایسے ٹھوس اقدامات کو اپنانا ہے جو مسئلہ فلسطین کے دو ریاستی حل پرعمل درآمد، اسرائیل اور فلسطینیوں کے درمیان دہائیوں سے جاری تنازعات کے خاتمے کا باعث بنیں گے۔

گزشتہ ماہ کانفرنس کی منسوخی پر فرانس کے صدر ایمانویل میکرون نے کہا تھا کہ سکیورٹی وجوہات کی بنا پرکا نفرنس کو منسوخ کیا جا رہا ہے تاہم یہ جلد ازجلد منعقد کی جائے گی، اس تاخیر سے دو ریاستی حل پرعمل درآمد کے ساتھ آگے بڑھنے کا ہمارا عزم متاثر نہیں ہوگا۔

(جاری ہے)

توقع کی جا رہی ہے کہ ایمانویل میکرون کانفرنس کے دوران فلسطینی ریاست کو تسلیم کرنے کا باضابطہ اعلان کریں گے، رواں ہفتے انہوں نے برطانوی حکومت پر بھی ایسا ہی کرنے پر زور دیا تھا۔

اقوام متحدہ کے 193 رکن ممالک میں سے 147 نے فلسطین کو باضابطہ طور پر تسلیم کیا ہوا ہے، فلسطین عالمی ادارے میں مبصر کی حیثیت رکھتا ہے لیکن مکمل رکنیت حاصل نہیں ۔مئی میں اقوام متحدہ کے ایک اجلاس کی تیاری کے دوران گفتگو کرتے ہوئے سعودی وزارت خارجہ کی مشیر منال رضوان نے کہا تھا کہ یہ کانفرنس ایسے موقع پر ہونے جا رہی ہے جب غزہ ناقابل تصور مصائب برداشت کر رہا ہے۔انہوں نے کہا کہ سعودی عرب کو فخر ہے کہ وہ ان دیگر ممالک کے ساتھ کھڑا ہے جو حقیقی اور دائمی تبدیلی لانے کی غرض سے سفارتی کوششوں کے لیے پرعزم ہیں تاکہ مسئلہ فلسطین کے پرامن حل کو ایک بار اور ہمیشہ کے لیے یقینی بنایا جا سکے۔