چوہدری شافع حسین کی زیر صدارت محکمہ اوقاف کابورڈ اجلاس ، 5 نکاتی ایجنڈے پر غور کیا گیا

لاہور (اُردو پوائنٹ اخبارتازہ ترین - اے پی پی۔ 12 جولائی2025ء) صوبائی وزیر اوقاف ومذہبی امور چوہدری شافع حسین کی زیر صدارت محکمہ اوقاف کے بورڈ کا اجلاس پیسک ہائوس میں منعقد ہوا جس میں 5 نکاتی ایجنڈے پر غور کیا گیا۔ترجمان کے مطابق بورڈ نے محکمہ اوقاف کے سالانہ تخمینہ جات برائے سال 26- 2025 اور گزشتہ سال کے نظر ثانی شدہ تخمینہ جات کی منظوری دی۔

بورڈ نے اوقاف کی زمینوں کے حوالے سے ریگولرائزیشن پالیسی کی بھی منظوری دے دی جس کے مطابق رہائشی زمینوں پر فی مرلہ ایک روپیہ کے حساب سے سالانہ 10فیصد اضافے کے ساتھ بقایاجات وصول کئے جائیں گے، اسی طرح کمرشل زمینوں پر 2 روپے فی مرلہ کے حساب سے سالانہ 10فیصد اضافے کے ساتھ بقایاجات وصول کئے جائیں گے، اس مقصد کیلئے ضرورت کے مطابق رولز میں تبدیلی بھی کی جائے گی۔

(جاری ہے)

اوقاف کی زمینوں پر قابضین کے حوالے سے محکمہ اوقاف کی کمیٹی سروے کرکے ڈیٹا اکھٹا کرے گی ،بقایاجات کی وصولی کیلئے ایک ماہ کے نوٹسز بھجوائے جائیں گے جس کی وصولی کے بعد محکمہ اوقاف کی اراضی استعمال کرنے والے محکمے کے ساتھ معاہدہ کرنے کے پابند ہوں گے۔بورڈ نے زرعی زمینوں کے حوالے سے محکمہ اوقاف میں ڈائریکٹر ایگریکلچر کی آسامی پیدا کرنے کی بھی منظوری دی۔

بورڈ نے محکمہ اوقاف کے ملازمین کیلئے ایڈہاک ریلیف الا ئونس اور اوقاف الائونس کی بھی منظوری دی، اوقاف کی زمینوں پر ناجائز قبضوں کے خاتمے کیلئے صوبائی وزرا اور سرکاری افسران پر مشتمل کمیٹی تشکیل دے دی گئی ہے جس میں صوبائی وزیر اوقاف ومذہبی امور چوہدری شافع حسین،صوبائی وزیر ہائوسنگ بلال یاسین،صوبائی وزیر زراعت سید عاشق حسین کرمانی، پارلیمانی سیکرٹری اوقاف ملک وحید،اراکین اسمبلی،سیکرٹری اوقاف اور دیگر شامل ہیں۔

صوبائی وزیر اوقاف ومذہبی امور چوہدری شافع حسین نے اجلاس سے خطاب کرتے ہوئے کہا کہ اوقاف کی اربوں روپے کی زمینیں ہرقیمت پر ناجائز قابضین سے واگزار کراکے عوام کے فلاحی منصوبوں کیلئے استعمال میں لائی جائیں گی۔انہوں نے کہا کہ اوقاف کی زمینوں پر ناجائز قبضوں کے خاتمے کیلئے ایکشن پلان بنا لیا ہے، محکمہ اوقاف کی آمدن بڑھانے کے لئے مزید موثر اقدامات کئے جائیں گے۔ صوبائی وزیر نے مزارات پر سکیورٹی بڑھانے کی ہدایت کی۔سیکریٹری اوقاف ڈاکٹر طاہر رضا بخآری نے بتایا کہ اخراجات کنٹرول کرکے محکمہ اوقاف کی آمدن بڑھائی گئی ہے، مانیٹرنگ کے موثر نظام کے باعث اہداف کا حصول ممکن بنایا گیا ہے۔ڈی جی مذہبی امور خالد محمود سندھو اور بورڈ ممبران نے بھی اجلاس میں شرکت کی۔