ایس آئی ایف سی کے 2برس، ترسیلات زر، سرمایہ کاری اور برآمدات میں نمایاں اضافہ

اسلام آباد (اُردو پوائنٹ اخبارتازہ ترین - این این آئی۔ 12 جولائی2025ء)ایس آئی ایف سی کے 2سال کے دوران ملکی ترسیلات زر، سرمایہ کاری اور برآمدات میں نمایاں اضافہ ہوا ہے۔رواں مالی سال کے پہلے 11 ماہ کے دوران ترسیلات زر میں غیر معمولی 28.79 فیصد اضافہ ریکارڈ کیا گیا، جو بڑھ کر 34.89 ارب ڈالر تک پہنچ گئی ہیں۔ وزیر خزانہ محمد اورنگزیب کے مطابق سال کے اختتام تک ترسیلات زر کا حجم 38 ارب ڈالر تک پہنچنے کا امکان ہے۔

ان ترسیلات زر کا 70 فیصد سعودی عرب، متحدہ عرب امارات، برطانیہ اور امریکا سے موصول ہوا۔اسی طرح برآمدات کے شعبے میں بھی مثبت پیش رفت دیکھنے میں آئی، جہاں صرف یورپی منڈیوں میں پاکستانی برآمدات میں 8.62 فیصد اضافہ ہوا اور 10 ماہ کے دوران یہ بڑھ کر 7.55 ارب ڈالر تک پہنچ گئیں۔

(جاری ہے)

خاص طور پر ٹیکسٹائل اور ملبوسات کی مانگ میں خاطر خواہ اضافہ دیکھنے میں آیا۔

ایس آئی ایف سی کی مربوط اور موثر پالیسیوں کی بدولت عالمی اداروں اور ریٹنگ ایجنسیوں کا پاکستان پر اعتماد بحال ہوا ہے۔عالمی مالیاتی ادارے نے پاکستان کی معیشت کو درست سمت میں قرار دیا جبکہ موڈیز نے ملکی آٹ لک کو مثبت کر دیا۔ اسی طرح، امریکی ایجنسی فچ ریٹنگز نے پاکستان کی کریڈٹ ریٹنگ کو +CCCسے بڑھا کر +Bکر دیا جو معاشی بہتری کا بڑا اشاریہ ہے۔

سرمایہ کاری کے میدان میں بھی مثبت رجحانات سامنے آئے، جن میں ربڑ کی مصنوعات میں 163فیصد اور سماجی خدمات کے شعبے میں 416فیصد اضافہ دیکھا گیا۔ تعمیرات اور سیمنٹ کے شعبے میں بھی سرمایہ کاری مستحکم رہی جب کہ انفراسٹرکچر منصوبوں میں بھی تیزی آئی۔مزید برآں پاکستان نے چین میں اپنا پہلا پانڈا بانڈ جاری کرنے کی تیاری مکمل کر لی ہے، جس سے حاصل شدہ فنڈز جدید زراعت، فارمنگ اور مصنوعی ذہانت پر مبنی منصوبوں پر خرچ کیے جائیں گے۔

ماحول دوست منصوبوں کو فروغ دینے کے لیے پاکستان کے پہلے گرین سکوک کا اجرا بھی کیا گیا، جس کے تحت 30 ارب روپے کی رقم 3 نئے ڈیمز سمیت مختلف توانائی منصوبوں کے لیے مختص کی گئی ہے۔آئی ایم ایف نے پاکستان کے لیے 1.4 ارب ڈالر کے پائیدار ترقیاتی فنڈ کی منظوری بھی دی ہے، جسے موسمیاتی استحکام، صاف توانائی اور مجموعی اقتصادی استحکام کے لیے استعمال کیا جائے گا۔وزیر اعظم شہباز شریف نے ایس آئی ایف سی کی ان کامیابیوں کو بھارتی سازشوں کی ناکامی اور قومی ترقی کی فتح قرار دیا اور کہا کہ یہ سب کچھ مربوط حکمت عملی اور قومی یکجہتی کے باعث ممکن ہو سکا ہے۔