کراچی، فائرنگ کے مختلف واقعات میں دو خواتین سمیت 3 افراد زخمی

تینوں زخمیوں کو طبی امداد کے لیے اسپتال منتقل کر دیا گیا

اتوار 13 جولائی 2025 12:00

کراچی(اُردو پوائنٹ اخبارتازہ ترین - این این آئی۔ 13 جولائی2025ء)شہر قائد میں فائرنگ کے 3 مختلف واقعات میں دو خواتین زخمی سمیت 3 افراد زخمی ہوگئے۔تفصیلات کے مطابق لیاقت آباد 10 نمبر شریف آباد تھانے کی حدود بس اسٹینڈ کے قریب فائرنگ کے نتیجے میں ایک خاتون زخمی ہوگئی۔ریسکیو ذرائع کے مطابق زخمی ہونے والی خاتون کی شناخت 22 سالہ ثناء زوجہ سفیان کے نام سے ہوئی ہے۔

خاتون کو زخمی حالت میں جناح اسپتال منتقل کیا گیا۔ترجمان کراچی پولیس کے مطابق واقعہ ڈکیتی کے دوران مزاحمت پر پیش آیا۔ ابتدائی تفتیش کے مطابق ملزمان خاتون سے نقدی چھین کر فرار ہوئے ہیں۔دوسری جانب نیو کراچی کے علاقے لاسی گوٹھ میں گھر کے اندر موجود خاتون کو نامعلوم سمت سے آنے والی اندھی گولی آ لگی۔

(جاری ہے)

ریسکیو ذرائع کے مطابق خاتون کی شناخت 40 سالہ فاطمہ زوجہ خالد کے نام سے ہوئی ہے، جنہیں فوری طور پر اسپتال منتقل کردیا گیا۔

ترجمان کراچی پولیس کا کہنا ہے کہ فاطمہ مکان نمبر 104 نیو کراچی ماسی گوٹھ کے اندر موجود تھیں جب وہ اندھی گولی کا نشانہ بنیں۔ واقعہ سہراب گوٹھ تھانے کی حدود میں پیش آیا۔ادھر شاہ فیصل کالونی امام بارگاہ کے قریب فائرنگ سے 22 سالہ عون عباس زخمی ہوا۔پولیس کے مطابق واقعہ سیکیورٹی گارڈ سے حادثاتی طور پر اسلحہ چلنے سے پیش آیا۔ پولیس نے سیکیورٹی گارڈ کو حراست میں لیکر واقعے کی تفتیش شروع کردی ہے جبکہ زخمی نوجوان کو طبی امداد کیلئے جناح اسپتال منتقل کیا گیا ہے۔