ہائر ایجوکیشن کمیشن میں تمام بھرتیاں روک دیں، نیا چیرمین میرٹ پر لگایا جائے گا، خالد مقبول

اتوار 13 جولائی 2025 18:05

اسلام آباد (اُردو پوائنٹ اخبارتازہ ترین - این این آئی۔ 13 جولائی2025ء)وفاقی وزیرِ تعلیم و پیشہ ورانہ تربیت ڈاکٹر خالد مقبول صدیقی نے کہا ہے کہ وفاقی ہائر ایجوکیشن کمیشن میں ڈی جیز، ایڈوائزر اور ای ڈی سمیت تمام بھرتیاں روک دی گئی ہیں، ہائر ایجوکیشن کا نیا چیئرمین میرٹ پر لگایا جائے گا۔وہ اتوار کو آرٹس کونسل میں نیشنل ووکیشنل اینڈ ٹیکنیکل ٹریننگ کمیشن کے زیرِ اہتمام تقسیمِ اسناد کی تقریب کے بعد گفتگو کر رہے تھے۔

انہوں نے کہا کہ 16 جولائی کو ہونے والے سرچ کمیٹی کے اجلاس میں چیئرمین کا اشتہار فائنل کر لیا جائے گا، تاہم نئے چیئرمین کی تلاش کے لیے کچھ وقت لگے گا اس دوران قائم مقام چیئرمین کا تقرر کر دیا جائے گا۔انہوں نے کہا کہ کراچی میں جامعہ کراچی سے بھی بڑی یونیورسٹی قائم کی جا رہی ہے جس کے لیے دو سو ایکڑ زمین درکار ہے۔

(جاری ہے)

ایک سوال کے جواب میں انہوں نے کہا کہ کراچی کے باشندوں کو قدیم اور بوسیدہ گھروں کی بنیاد پر بے گھر نہیں ہونے دیا جائے گا، اس کے لیے ہم عدالت جائیں گے۔

ڈاکٹر خالد مقبول صدیقی نے کہا کہ شہری نشانے پر ہیں، دیکھنا یہ ہے کہ کس نے ان کو نشانے پر لیا ہوا ہے، اس صوبے میں سب سے زیادہ ترقی کرنے والی کرپشن کی انڈسٹری ہے، یہ بڑا المیہ ہے کہ متاثرین کی مدد کے لیے بھی اجازت لینی پڑتی ہے۔وفاقی وزیرِ تعلیم نے کہا کہ ہم خود غیر قانونی تعمیرات اور بلڈنگ کنٹرول اتھارٹی کے خلاف مقدمہ درج کروائیں گے، ہم سندھ بلڈنگ اتھارٹی کے خلاف ایف ائی آر درج کروائیں گے۔