نوابزادہ سراج رئیسانی شہید نے ہمیشہ امن، ترقی اور عوامی حقوق کیلئے آواز بلند کی، غلام رسول خان

اتوار 13 جولائی 2025 22:00

کوئٹہ (اُردو پوائنٹ اخبارتازہ ترین - اے پی پی۔ 13 جولائی2025ء) صوبائی مشیر برائے محکمہ لیبر اینڈ مین پاور سردار بابا غلام رسول خان عمرانی نےایم این اے جمال رئیسانی سے ان کی رہائش گاہ پر ملاقات کی اور ان کے والد، نوابزادہ سراج رئیسانی کی شہادت کے سات برس مکمل ہونے پر دلی تعزیت اور اظہارِ یکجہتی کیا۔

(جاری ہے)

اس موقع پر سردار بابا غلام رسول خان عمرانی نے نوابزادہ سراج رئیسانی کی قومی خدمات کو خراجِ عقیدت پیش کرتے ہوئے کہا کہ نوابزادہ سراج رئیسانی شہید بلوچستان کے ان جری سپوتوں میں سے تھے جنہوں نے ہمیشہ امن، ترقی اور عوامی حقوق کے لیے اپنی آواز بلند کی۔

ان کی شہادت نہ صرف ان کے خاندان بلکہ پورے صوبے کے لیے ایک ناقابلِ تلافی نقصان ہے۔ انہوں نے مزید کہا کہ ہمیں چاہیے کہ ہم نوابزادہ سراج رئیسانی شہید کے مشن اور ان کے ویژن کو زندہ رکھیں۔ ان کی قربانی ہمیں یہ سبق دیتی ہے کہ ہم اپنے لوگوں کے مسائل کے حل اور خطے کی خوشحالی کے لیے بلا خوف کام کریں۔