رائٹ مینجمنٹ پولیس کے 3 ہزار اہلکاروں پر مشتمل پہلے بیج کی تربیت مکمل

پیر 14 جولائی 2025 22:41

لاہور (اُردو پوائنٹ اخبارتازہ ترین - آن لائن۔ 14 جولائی2025ء) رائٹ مینجمنٹ پولیس، لا اینڈ آرڈر یقینی بنانے کے لئے وزیر اعلی پنجاب مریم نواز کا خواب تعبیر کی جانب گامزن ہے۔ اسی سلسلے میں رائٹ مینجمنٹ پولیس کے 3 ہزار اہلکاروں پر مشتمل پہلے بیج کی تربیت مکمل کر لی گئی ہے۔ ترجمان پنجاب پولیس نے تفصیلات سے آگاہ کرتے ہوئے بتایا کہ رائٹ مینجمنٹ پولیس کے پہلے بیچ کی پاسنگ آؤٹ اگلے چند روز میں متوقع ہے جس کے بعدزیر تربیت اہلکاروں کو ریجنل ہیڈ کوارٹرز میں فرائض کی ادائیگی کیلئے بھیجا جائے گا۔

ایڈیشنل آئی جی رائٹ مینجمنٹ پولیس خرم شکور نے ڈی آئی جی رائٹ مینجمنٹ پولیس اسد سرفراز کے ہمراہ پولیس ٹریننگ سکول فاروق آباد کا دورہ کیا۔ دورے کے دوران ڈی آئی جی اسد سرفراز نے ایڈیشنل آئی آر ایم پی کو فورس کی ٹریننگ بارے بریفنگ دی۔

(جاری ہے)

ایڈیشنل آئی جی آر ایم پی خرم شکور نے ٹریننگ کرنے والے جوانوں کا حوصلہ بڑھاتے ہوئے کہا کہ دور حاضر کے لا اینڈ آرڈر چیلنجز کو مدنظر رکھتے ہوئے فورس کی جدید خطوط پر تربیت یقینی بنائی گئی ہے۔

انہوں نے مزید کہا کہ 08 ہفتوں پر مشتمل کورس میں فورس کی فٹنس، کارکردگی کا اعلی معیار برقرار رکھنے کے لئے سپیشل ڈرلز ڈیزائن کی گئیں۔ ایڈیشنل آئی جی رائٹ مینجمنٹ پولیس نے مزید بتایا کہ رائٹ مینجمنٹ پولیس کے لئے خصوصی آلات، ساز و سامان کی خریداری مکمل کر لی گئی ہے جبکہ حکومت پنجاب کی منظوری کے بعد 2 ہزار مزید اہلکاروں کی بھرتی کا مرحلہ شروع کیا جائے گا۔

ایڈیشنل آئی جی آر ایم پی خرم شکور نے فورس کی اعلی معیار پر تربیت کے لئے ٹریننگ سٹاف کی کاوشوں کو بھی سراہا۔ ترجمان پنجاب پولیس نے بتایا کہ ابتدائی طور پر لاہور اور راولپنڈی میں 500 آر ایم پی اہلکار، تمام ریجنل دفاتر میں 250 اہلکار بھیجے جائیں گے۔ انہوں نے مزید بتایا کہ افسران و اہلکاروں پر مشتمل ٹیموں میں موب انگیجمنٹ، موب کنٹرول، واٹر کینن، آنسو گیس، ربر بلٹ، سٹن گرینیڈ، لانگ رینج صوتی ڈیوائس، انخلا، گرفتاری، فرسٹ ایڈ، ایڈوانس پارٹی، ڈرون آپریشن، سنائپرز، کے نائن ہنڈلرز ٹیمیں شامل ہیں۔