فیصل آباد سے ٹیکسٹائل کے علاوہ فوڈ اور کیمیکل سمیت دیگر ہر قسم کی مصنوعات برآمد کی جا سکتی ہیںJ ایگزیکٹو ممبر اشفاق احمد

منگل 15 جولائی 2025 14:58

مکوآنہ (اُردو پوائنٹ اخبارتازہ ترین - این این آئی۔ 15 جولائی2025ء)فیصل آباد چیمبر آف کامرس اینڈانڈسٹری کے نائب صدر شاہد ممتاز باجوہ نے فیصل آباد چیمبر اور سرحد چیمبر کے درمیان دو طرفہ تعلقات کو بڑھانے پر زور دیا ہے تاکہ وسط ایشیائی ریاستوں کو پاکستانی برآمدات کے پوٹینشل سے فائدہ اٹھایا جا سکے۔ وہ سرحد چیمبر آف کامرس اینڈانڈسٹری پشاور کے ایگزیکٹو ممبر اشفاق احمد سے گفتگو کر رہے تھے جنہوں نے اُن سے فیصل آباد چیمبر میں ملاقات کی۔

شاہد ممتاز باجوہ نے کہا کہ فیصل آباد سے ٹیکسٹائل کے علاوہ فوڈ اور کیمیکل سمیت دیگر ہر قسم کی مصنوعات برآمد کی جا سکتی ہیں جبکہ سرحد کے سرمایہ کاروں کو فیڈمک کے زیر اہتمام قائم انڈسٹریل اسٹیٹس میں بھی سرمایہ کاری کرنی چاہیے۔

(جاری ہے)

انہوں نے کہا کہ فیصل آباد اور سرحد چیمبر کے ممبران کے تعاون سے فاضل پیداوار کی براہ راست اور باضابطہ برآمد کی حوصلہ افزائی ہو گی۔

سرحد چیمبر کے اشفاق احمد نے تاجروں، صنعتکاروں اور برآمد کنندگان میں رابطے بڑھانے کی ضرورت پر زور دیا تاکہ برآمدات میں تیزی سے اضافہ کیا جا سکے۔ اِس موقع پر شاہد ممتاز باجوہ نے اشفاق احمد کو فیصل آباد چیمبر آف کامرس اینڈانڈسٹری کی شیلڈ پیش کی جبکہ اشفاق احمد نے انہیں سرحد چیمبر کی شیلڈ کے علاوہ اپنے علاقے کی روایتی ٹوپی اور چادر کا بھی تحفہ پیش کیا۔