پاکستان اور مصر کے درمیان باہمی تجارتی حجم میں اضافے کی وسیع گنجائش موجود ہے، عاطف اکرام شیخ

منگل 15 جولائی 2025 16:24

اسلام آباد (اُردو پوائنٹ اخبارتازہ ترین - اے پی پی۔ 15 جولائی2025ء) فیڈریشن آف پاکستان چیمبرز آف کامرس اینڈ انڈسٹریز (ایف پی سی سی آئی ) کے صدر عاطف اکرام شیخ نے کہا ہے کہ پاکستان اور مصر کے درمیان تجارتی حجم میں اضافے کی وسیع گنجائش موجود ہے۔ان خیالات کا اظہار انہوں نے منگل کے روز پاکستان میں مصر کے سفیر ڈاکٹر ایہاب محمد عبد الحامد سے ملاقات کے دوران کیا۔

ملاقات میں دونوں ممالک کے درمیان تجارتی تعلقات کی بہتری سمیت باہمی دلچسپی کے امور پر تبادلہ خیال کیا گیا۔

(جاری ہے)

صدر ایف پی سی سی آئی نے دونوں ممالک کے درمیان فری ٹریڈ ایگریمنٹ کی اہمیت کو بھی اجاگر کیا ۔ انہوں نے دونوں ممالک کے درمیان حالیہ برسوں میں تجارتی حجم کی کمی پر تشویش کا اظہار کیا اور فوری اقدامات تجویز کیے۔ا ن کا کہنا تھا کہ دونوں ممالک میں تجارت کی نئی راہیں تلاش کرنے کےلئے بزنس وفود کا تبادلہ ہونا چاہیے۔

مصر کے سفیر نے اپنے ملک میں پاکستانی سرمایہ کاروں کے لیے موجود کاروباری مواقع سے آگاہ کیا ۔ ایہاب محمد عبد الحامد نے کہا کہ مصر پاکستان کے ساتھ تعلقات کو بڑی اہمیت دیتا ہے اور اس کے ساتھ مختلف شعبوں میں باہمی تجارتی تعلقات میں اضافے کےلئے پر عزم ہے۔