مالاکنڈ ڈویژن میں تجاوزات کے خلاف آپریشن کی رپورٹ صوبائی حکومت کو موصول ہوگئی، رپورٹ

منگل 15 جولائی 2025 17:50

پشاور(اُردو پوائنٹ اخبارتازہ ترین - اے پی پی۔ 15 جولائی2025ء) مالاکنڈ ڈویژن میں تجاوزات کے خلاف آپریشن کی رپورٹ صوبائی حکومت کو موصول ہوگئی۔ رپورٹ میں بتایا گیا ہے کہ سوات، باجوڑ، بونیر، دیرلوئر، دیراپر اور ضلع ملاکنڈ میں تجاوزات کےخلاف آپریشن کیا گیا،2 ہفتوں کے آپریشن میں مالاکنڈ ڈویژن کے 9 اضلاع میں 63 عمارتیں اور سوات میں ایک عمارت سیل کی گئی جبکہ 20 کنال سے زیادہ رقبے پر عمارتیں گرادی گئیں۔

رپورٹ میں بتایا گیا ہے کہ سوات میں 204 سے زیادہ کنال رقبے پر تجاوزات ہیں، 79 کنال رقبے کو کلیئرکردیا اور سوات میں 12 کلومیٹر سے زیادہ رقبے کی حدبندی کی گئی۔ رپورٹ کے مطابق باجوڑ میں 16، بونیر میں 9، دیرلوئر میں 22، دیراپر میں 11 اور ضلع مالاکنڈ میں 4 عمارتیں سیل کی گئیں جبکہ مجوعی طورپر 96 کنال سے زیادہ رقبے پر تجاوزات میں آنے والی عمارتیں گرادی گئیں۔

(جاری ہے)

رپورٹ میں مزید بتایا گیا ہے کہ مالاکنڈ ڈویژن میں588 کنال سے زیادہ رقبے پر تجاوزات ہیں، 198 کنال سے زیادہ رقبے سے تجاوزات کا خاتمہ کیا گیا جب کہ 159 کلومیٹر سےزیادہ رقبےکی حد بندی کی گئی اور 60 مقامات پرباڑ لگائی گئی۔ اس حوالے سے کمشنر مالاکنڈ عابد وزیر بتایا کہ مالاکنڈ ڈویژن میں انتظامیہ اور ریسکیو کی ٹیمیں 24 گھنٹے فیلڈ میں ہوں گی، دریاؤں کے کنارے ہوٹلز کو باڑ لگانے کے احکامات جاری کردیے ہیں۔انہوں نے کہاکہ واگزار کرائی گئی زمین پر محکمہ جنگلات اور محکمہ زراعت کو پودے لگانے کی ہدایت کی ہے جبکہ تجاوزات کے خلاف آپریشن کا دائرہ کار کمرشل پلازوں تک بڑھایا جائے گا اور بغیر پارکنگ پلازوں کے خلاف کارروائی ہوگی۔