تربیت کے فقدان کی وجہ سے نوجوان نسل عدم برداشت اورفرسٹریشن کا شکار ہے،لبنی ٰمشتاق

منگل 15 جولائی 2025 23:21

لاہور (اُردو پوائنٹ اخبارتازہ ترین - اے پی پی۔ 15 جولائی2025ء) منہاج القرآن ویمن لیگ کی سنٹرل کوآرڈینیشن کونسل کی رکن لبنیٰ مشتاق نے راولپنڈی میں باپ کے ہاتھوں 16سالہ بیٹی کے قتل کے افسوسناک واقعہ پر کہا ہے کہ اخلاقی تربیت کے فقدان نے مقدس رشتوں کو گہنا دیا ہے۔وہ ویمن لیگ کے مشاورتی اجلاس میں اظہار خیال کر رہی تھیں۔انہوں نے کہا کہ دین سے دوری کی وجہ سے پیارے رشتے نفرت و انتقام کی بھینٹ چڑھ رہے ہیں۔

لبنیٰ مشتاق نے کہا کہ تربیت کے فقدان کی وجہ سے نوجوان نسل عدم برداشت اورفرسٹریشن کا شکار ہے،ان سماجی عوارض کے علاج کیلئے ڈاکٹر محمد طاہر القادری نے گھروں کو مراکز علم و تربیت بنانے کا ویژن دیا ہے،اس ویژن کی روشنی میں تحریک منہاج القرآن ملک بھر میں 25 ہزار ماڈل مراکز علم قائم کر رہی ہے،یہ مراکز علم گھروں میں قائم ہوں گے جن کے پہلے رکن افراد خانہ ہوں گے۔

(جاری ہے)

انہوں نے کہاکہ ادارہ گزشتہ 10سال سے آئندہ نسلوں کی اخلاقی تربیت پر فوکس کئے ہوئے ہے اور وہ والدین کوآگاہ کیاجا رہا ہے کہ اولاد کی ابتدائی عمر تربیت کی ہوتی ہے۔انہوں نے کہا کہ اخلاقی قدروں کے احیا کیلئے گھروں کو مصطفوی تعلیم و تربیت کے مراکز میں بدلنا ہو گا۔ لبنیٰ مشتاق نے کہاکہ سوسائٹی کو امن،ادب و احترام کا گہوارہ بنانے کیلئے سب سے پہلے گھروں کے ماحول کو ٹھیک کرنا ہو گا ۔