آئندہ تادیبی کارروائی کریں گے،سلمان اکرم راجہ عالیہ حمزہ کے بیان پر برہم

جس نے غلطی کی وہ معافی مانگے، رابط کرنے کی کوئی ضرورت نہیں ہے، پی ٹی آئی رہنماکی اڈیالہ جیل کے باہر میڈیا سے گفتگو

منگل 15 جولائی 2025 20:55

راولپنڈی(اُردو پوائنٹ اخبارتازہ ترین - این این آئی۔ 15 جولائی2025ء)پی ٹی آئی رہنما سلمان اکرم راجہ نے پی ٹی آئی پنجاب کی چیف آرگنائزر عالیہ حمزہ کے بیان پر غصہ کرتے ہوئے کہاہے کہ انہیں ٹوئٹ نہیں کرنی چاہیے تھی اور تمام گفتگو بیوقوفانہ کی گئی اگر اس کے بعد کوئی بات ہوئی تو تادیبی کارروائی کریں گے۔اڈیالہ جیل کے باہر میڈیا سے گفتگو کرتے ہوئے سلمان اکرم راج نے کہا کہ عالیہ حمزہ کو لاہور ایونٹ پر ٹویٹ نہیں کرنی چاہیے تھی۔

سلمان اکرم راجہ صحافیوں کے سوالات پر غصے کرتے ہوئے کہاکہ ایک بیوقوفی اور سازش کی بنیاد پر مسئلہ بنایا گیا، لاہور میں جو نہیں آیا وہ اپنی مرضی سے نہیں آیا، مدعو کرنے کا مسئلہ ہی نہیں ہے۔انہوں نے کہا کہ پریس کانفرنس میں آنے کی کسی کو ضرورت نہیں تھی، میں اس لیے گیا کہ وزیراعلیٰ آیا ہے اچھا نہیں لگتا وہ اکیلے پریس کانفرنس کرتا، اگر کوئی آنا چاہتا تھا تو آسکتا تھا نہ دعوت کی ضرورت تھی اور نہ ہم نے کسی کو روکنا تھا۔

(جاری ہے)

سلمان اکرم راجہ نے کہا کہ بانی نے جو تاریخ دی ہے وہی رہے گی کوئی 90دن معنی نہیں رکھتے، میں جو بات کر رہا ہوں ٹھیک کر رہا ہوں، کسی میں میری بات رد کرنے کی ہمت ہے تو میں اسے دیکھ لوں گا۔انہوں نے کہاکہ تمام گفتگو بیوقوفانہ کی گئی، اگر اس کے بعد کوئی بات ہوئی تو تادیبی کارروائی کریں گے۔رہنما پی ٹی آئی نے کہاکہ لاہور کے ایونٹ کو سازش کے تحت متنازع بنایا گیا، کیا وجہ تھی پریس کانفرنس کے بعد ٹوئٹ کرنے کی، میں اس ٹوئٹ کو مسترد کرتا ہوں، خبر دار ایسی کوئی ٹویٹ دوبارہ کی گئی۔

انہوں نے کہا کہ جس نے غلطی کی ہے وہ معافی مانگے، رابط کرنے کی کوئی ضرورت نہیں ہے، عالیہ حمزہ کا کام پنجاب کو موبلائز کرنا ہے وہ اپنا کام کرے، عالیہ حمزہ کا کام ٹوئٹ کرنا نہیں ہے، ہم بانی کے احکامات کے تحت تحریک چلائیں گے۔