' ڈائریکٹر لائیوسٹاک ڈاکٹر سید ندیم بدر نے ضلع فیصل آباد کی تحصیل فیصل آباد اور تحصیل جڑانوالہ کے مختلف ویٹرنری ہسپتالوں اور کیٹل فیڈ مل کا معائنہ

منگل 15 جولائی 2025 21:10

% فیصل آباد (اُردو پوائنٹ اخبارتازہ ترین - آن لائن۔ 15 جولائی2025ء) ڈائریکٹر لائیوسٹاک ڈاکٹر سید ندیم بدر نے ضلع فیصل آباد کی تحصیل فیصل آباد اور تحصیل جڑانوالہ کے مختلف ویٹرنری ہسپتالوں اور کیٹل فیڈ مل کا معائنہ کیا ۔انہوں نے سول ویٹرنری ہسپتال عباس پور، ٹھیکری والا،213 ر ب اور گرینش کیٹل فیڈ مل شامل تھیں۔انہوں نے دورے کے دوران حاضری رجسٹر، او پی ڈی، صفائی ستھرائی، کسان لائیوسٹاک بیٹھک ریکارڈ، وزیر اعلی پنجاب لائیوسٹاک ریکارڈ، سپلائی چین، ادویات و ویکسین کا ریکارڈ، ٹینٹیٹو ٹور پروگرام، ڈیلی ڈائری، پرچی فیس رجسٹر، شجرکاری ریکارڈ، اور مصنوعی نسل کشی (AI) سے متعلق ریکارڈ کی جانچ کی۔

اس موقع پر فیلڈ سٹاف کو ہدایت کی گئی کہ پی ایل سی فیزII پر خصوصی توجہ دی جائے، ہسپتالوں میں کاشتکاروں کے لیے بیٹھنے کے بہتر انتظامات کئے جائیں، صفائی اور تازہ پانی کی فراہمی یقینی بنائی جائے، تمام اینٹی بایوٹکس و ویکسین دستیاب ہوں، جاری ویکسینیشن بروقت مکمل کی جائے، کولڈ چین کا تحفظ کیا جائے، کاشتکاروں کو منہ کھر، کانگو بخار اور برسات کے دوران جانوروں کی دیکھ بھال سے متعلق آگاہی دی جائے۔

(جاری ہے)

ڈائریکٹر لائیوسٹاک نے کہا کہ اے ڈی آر ایس فارمر ایپ کے استعمال کو فروغ دیا جائے اور ایس ایم ایس 9211 پر ڈیٹا بروقت اپلوڈ کیا جائے۔مزید براں انہوں نے ویٹرنری ہسپتالوں سے ملحقہ دیہات میں کاشتکاروں سے ملاقات بھی کی جنہوں نے محکمہ کی سروس ڈیلیوری پر اطمینان کا اظہار کیا۔بعد ازاں انہوں نے گرینش کیٹل فیڈ مل جڑانوالہ کا تفصیلی معائنہ کیاجہاں فیڈ کی سٹوریج، اسٹوریج طریقہ کار ، لیبارٹری ٹیسٹنگ سہولیات اور آپریشنل سسٹمز کا جائزہ لیا گیا۔ اس موقع پر پنجاب اینیمل فیڈ سٹف اینڈ کمپاؤنڈ فیڈ ایکٹ2016ء پر عملدرآمد یقینی بنانے اور معیاری فیڈ کی فراہمی کے حوالے سے ضروری ہدایات جاری کی گئیں۔