ممکنہ مون سون بارشوں کے پیش نظر ہنگامی بنیادوں پر تمام انتظامات مکمل کر لیے ،چیف آفیسر میونسپل کمیٹی ڈیرہ مراد جمالی

بدھ 16 جولائی 2025 13:49

ڈیرہ مراد جمالی (اُردو پوائنٹ اخبارتازہ ترین - اے پی پی۔ 16 جولائی2025ء) چیف آفیسر میونسپل کمیٹی ڈیرہ مراد جمالی محمد سلیم ڈومکی نے کہا ہے کہ میونسپل کمیٹی نے ممکنہ مون سون بارشوں کے پیش نظر ہنگامی بنیادوں پر تمام انتظامات مکمل کر لیے ہیں تاکہ شہریوں کو کسی بھی قسم کی پریشانی کا سامنا نہ کرنا پڑے۔ انہوں نے بتایا کہ شہر میں بارشوں کا پانی نکالنے کے لیے تین بوزر مشینیں، موٹرز، پائپس اور دیگر ضروری سامان مکمل طور پر الرٹ کر دیا گیا ہے جبکہ تمام مشینری کو فعال حالت میں رکھا گیا ہے۔

چیف آفیسر میونسپل کمیٹی کا کہنا تھا کہ مون سون کے دوران کسی بھی ہنگامی صورتحال سے نمٹنے کے لیے میونسپل عملے کی چھٹیاں منسوخ کر دی گئی ہیں اور تمام ملازمین کو ہائی الرٹ رہنے کی ہدایات جاری کر دی گئی ہیں۔

(جاری ہے)

انہوں نے کہا کہ عملے کو مختلف علاقوں میں تعینات کر دیا گیا ہے تاکہ بارش کی صورت میں فوری نکاسی آب کو یقینی بنایا جا سکے اور شہریوں کو مسائل کا سامنا نہ کرنا پڑے۔ انہوں نے مزید کہا کہ میونسپل کمیٹی کا مقصد شہریوں کو ریلیف دینا ہے، اسی لیے تمام دستیاب وسائل بروئے کار لائے جا رہے ہیں ۔انہوں نے شہریوں سے بھی اپیل کی کہ وہ مون سون کے دوران تعاون کریں اور پانی کی نکاسی میں رکاوٹ بننے والی اشیاء کو نالوں میں نہ ڈالیں تاکہ نکاسی آب کا نظام متاثر نہ ہو۔\378