بھارتی کرکٹ بورڈ کو روہت شرما اور ویرات کوہلی کی یاد ستانے لگی

روہت شرما اور ویرات کوہلی کی ریٹائرمنٹ کے بعد ٹاپ آرڈر میں عدم استحکام نظر آیا

بدھ 16 جولائی 2025 14:47

بھارتی کرکٹ بورڈ کو روہت شرما اور ویرات کوہلی کی یاد ستانے لگی

نئی دہلی (اُردو پوائنٹ اخبارتازہ ترین - این این آئی۔ 16 جولائی2025ء)بھارتی کرکٹ ٹیم کی غیر مستحکم کارکردگی کے بعد بی سی سی آئی کو ٹیم انڈیا میں روہت شرما اور ویرات کوہلی کی یاد ستانے لگی ہے۔بی سی سی آئی کے نائب صدر راجیو شکلا نے اعتراف کیا ہے کہ ٹیم انڈیا میں روہت شرما اور ویرات کوہلی کی غیر موجودگی واضح محسوس کی جارہی ہے۔ان کا کہنا تھا کہ دونوں کھلاڑیوں کی ریٹائرمنٹ ان کا ذاتی فیصلہ تھا اور بی سی سی آئی کی پالیسی کے مطابق کسی کھلاڑی کو ریٹائرمنٹ لینے کے لیے نہیں کہا جاتا۔

راجیو شکلا نے لندن میں میڈیا سے گفتگو کرتے ہوئے کہا ’’ہم سب روہت شرما اور ویرات کوہلی کی غیر موجودگی کو شدت سے محسوس کر رہے ہیں۔ ان کی ریٹائرمنٹ کا فیصلہ ان کا ذاتی تھا۔ بی سی سی آئی کی پالیسی یہ ہے کہ ہم کبھی بھی کسی کھلاڑی کو ریٹائر ہونے کے لیے نہیں کہتے۔

(جاری ہے)

ان دونوں کو ہمیشہ عظیم بلے بازوں کے طور پر یاد رکھا جائے گا۔‘‘یاد رہے کہ ورلڈ کپ 2024 کے بعد ویرات کوہلی اور روہت شرما نے ٹی ٹوئنٹی انٹرنیشنل کرکٹ سے ریٹائرمنٹ کا اعلان کیا تھا، جس نے بھارتی کرکٹ شائقین کو حیران اور افسردہ کردیا تھا۔

دونوں کھلاڑیوں نے اپنے کیریئر کے آخری میچ میں بہترین کارکردگی دکھاتے ہوئے بھارت کو ورلڈ کپ جتوانے میں کلیدی کردار ادا کیا تھا۔روہت شرما نے ٹی ٹوئنٹی کیریئر میں 4231 رنز اسکور کیے، جن میں 5 سنچریاں شامل ہیں، جبکہ ویرات کوہلی نے 4188 رنز بنائے اور کئی اہم مواقع پر ٹیم کو فتح دلانے میں کردار ادا کیا۔ دونوں کھلاڑیوں کی جوڑی بھارتی کرکٹ کی کامیابی کی پہچان سمجھی جاتی تھی اور ان کے جانے کے بعد ٹیم انڈیا کو قیادت اور تجربے کی کمی کا سامنا کرنا پڑ رہا ہے۔

دوسری جانب بی سی سی آئی نے اشارہ دیا ہے کہ اگر روہت شرما اور ویرات کوہلی مستقبل میں ون ڈے یا ٹیسٹ کرکٹ کھیلنے کا فیصلہ کریں گے تو بورڈ ان کے فیصلے کا احترام کرے گا، کیونکہ ان کی موجودگی بھارتی ٹیم کے لیے حوصلہ افزا ثابت ہو سکتی ہے۔بھارتی میڈیا رپورٹس کے مطابق روہت شرما اور ویرات کوہلی کی ریٹائرمنٹ کے بعد ٹاپ آرڈر میں عدم استحکام نظر آیا جبکہ نئے کھلاڑیوں پر انحصار کے باوجود کلیدی میچوں میں پرفارمنس کا فقدان رہا۔ کوچ راہول ڈریوڈ کی کوچنگ میں بھی پرانی چمک نظر نہیں آ رہی۔انگلینڈ کے خلاف حالیہ سیریز میں بھارتی ٹیم کی کارکردگی غیر مستقل رہی ہے، جس کے بعد کرکٹ شائقین اور بورڈ میں دونوں سینئر کھلاڑیوں کی یاد شدت سے محسوس کی جارہی ہے۔