فیصل بینک اوراسمارٹ 1- ٹیک کے درمیان ڈیجیٹل ادائیگیوں کے فروغ کے لیے اسٹریٹجک اشتراک

بدھ 16 جولائی 2025 16:52

کراچی(اُردو پوائنٹ اخبارتازہ ترین - این این آئی۔ 16 جولائی2025ء)فیصل بینک لمیٹڈ اور جدید فن ٹیک کمپنی اسمارٹ 1-ٹیک (پرائیویٹ)لمیٹڈ کے درمیان ڈیجیٹل ادائیگیوں کے فروغ اور مائیکرو، اسمال اور میڈیم انٹرپرائزز (MSMEs) کے لیے محفوظ، کیش لیس ادائیگی کے نظام کے قیام کے حوالے سے اسٹریٹجک شراکت داری طے پا گئی ہے۔یہ شراکت داری فیصل بینک کی فن ٹیک پارٹنرشپ کے ذریعے مالی شمولیت کو فروغ دینے کی پالیسی کا حصہ ہے، جو خاص طور پر چھوٹے اور درمیانے درجے کے کاروباروں کو ڈیجیٹل فنانس کی سہولیات فراہم کرنے پر مرکوز ہے۔

معاہدے پر دستخط کی تقریب فیصل بینک کے ہیڈ آفس میں منعقد ہوئی جس میں دونوں اداروں کی سینئر قیادت نے شرکت کی۔فیصل بینک کے چیف ڈیجیٹل آفیسر امین الرحمن نے تقریب سے خطاب کرتے ہوئے کہا کہ اسمارٹ 1-ٹیک کے ساتھ ہمارا اشتراک پاکستان میں ڈیجیٹل ادائیگیوں کے نظام کے فروغ کی جانب ایک نمایاں قدم ہے۔

(جاری ہے)

ہم اشتراک کو ترقی اور جدت کا اہم ذریعہ سمجھتے ہیں، اور یہ معاہدہ ہمارے ڈیجیٹل ایکو سسٹم کو مزید مضبوط بنانے کے وژن کا حصہ ہے۔

اسمارٹ 1-ٹیک کے سی ای او علی احمد نے کہا کہ فیصل بینک جیسے ادارے کے ساتھ شراکت داری ہمارے لیے ایک اعزاز ہے۔ یہ اشتراک پاکستان میں ڈیجیٹل مالیاتی نظام کو مضبوط کرنے اور پائیدار معاشی ترقی کو فروغ دینے میں کلیدی کردار ادا کرے گا۔معاہدے کے تحت راست P2M کیو آر کوڈ پر مبنی ڈیجیٹل ادائیگی کے حل کو چھوٹے اور درمیانے درجے کے کاروباروں میں متعارف کرایا جائے گا تاکہ انہیں جدید، محفوظ اور بغیر نقدی ادائیگیوں کے نظام سے جوڑا جا سکے۔

اس کا مقصد پاکستان میں کیش لیس معیشت کے قیام کی رفتار کو تیز کرنا اور مالیاتی نظام کو مزید شفاف اور قابل رسائی بنانا ہے۔یہ اشتراک پاکستان میں ڈیجیٹل ادائیگیوں کے شعبے میں اہم پیش رفت کے طور پر دیکھا جا رہا ہے، جس سے کاروباری طبقے اور صارفین دونوں کو فائدہ پہنچے گا۔