خیبر پختونخوا،ژوندون او پی ڈی کارڈ کے تحت مستحق خاندانوں کی رجسٹریشن کےعمل کا آغاز

بدھ 16 جولائی 2025 18:59

پشاور (اُردو پوائنٹ اخبارتازہ ترین - اے پی پی۔ 16 جولائی2025ء) مشیر صحت خیبر پختونخوا احتشام علی کی ہدایت پر’’ژوندون او پی ڈی کارڈ‘‘کے تحت مستحق خاندانوں کی رجسٹریشن کا عمل شروع کر دیا گیا ہے۔ژوندون او پی ڈی کارڈ انتظامیہ کے مطابق اس مقصد کے لیے ضلع مردان کی تمام تحصیلوں میں آگاہی مہم جاری ہے تاکہ ہر مستحق خاندان تک مفت او پی ڈی خدمات پہنچ سکیں۔

(جاری ہے)

مشیر صحت نے اپنے بیان میں کہا ہے کہ مفت او پی ڈی کی سہولت بانی پی ٹی آئی کا دیرینہ خواب تھا جسے وزیراعلیٰ خیبرپختونخوا علی امین گنڈاپور نے ’’ژوندون کارڈ‘‘ کے ذریعے حقیقت کا روپ دیا۔انہوں نے مزید بتایا کہ ضلع مردان میں 60 سرکاری اور نجی صحت مراکز کو اس سکیم میں شامل کیا جا رہا ہے جہاں مفت او پی ڈی کی سہولیات فراہم کی جائیں گی۔ اس سکیم سے مردان کے 60 ہزار سے زائد مستحق خاندان مستفید ہوں گے۔مشیر صحت کا کہنا تھا کہ محکمہ صحت کی ٹیمیں ہر تحصیل میں مستحق خاندانوں کی رجسٹریشن اور آگاہی کے لیے سرگرم ہیں تاکہ زیادہ سے زیادہ لوگ اس سہولت سے فائدہ اٹھا سکیں۔