Live Updates

ملک بھر میں گھی کی قلت کا خدشہ، ملزغیرمعینہ مدت کیلئے بند کرنے کی دھمکی

جمعرات 17 جولائی 2025 22:53

کراچی (اُردو پوائنٹ اخبارتازہ ترین - آن لائن۔ 17 جولائی2025ء)پاکستان بناسپتی مینوفیکچررز ایسوسی ایشن نے بڑا اعلان کرتے ہوئے خبردار کیا ہے کہ اگر حکومت نے ان کے مطالبات تسلیم نہ کیے تو ملک بھر کی گھی ملز جمعہ کے بعد غیرمعینہ مدت کے لیے بند کر دی جائیں گی۔ ایسوسی ایشن کے صدر شیخ عمرریحان نے کہا ہے کہ یہ ہڑتال محض ایک دن کی نہیں بلکہ غیرمعینہ مدت کی ہوگی، اور اگر مذاکرات ناکام ہوئے تو ملک بھر میں گھی اور آئل کی سپلائی مکمل طور پر بند کر دی جائے گی۔

(جاری ہے)

شیخ عمر ریحان کے مطابق فیڈرل بورڈ آف ریونیو (ایف بی آر) کی جانب سے گھی ملوں میں اہلکاروں کی تعیناتی نے انڈسٹری کو شدید دباؤ کا شکار کر دیا ہے، اور اس سے کاروباری ماحول میں خوف کی فضا قائم ہو گئی ہے۔ انہوں نے کہا کہ حکومت کی جانب سے 37 اے، ڈیجیٹل انوائسز، اور بینکوں کے ذریعے 2 لاکھ روپے سے زائد لین دین کی لازمی شرط انڈسٹری کیلئے ناقابل قبول ہیں۔ایسوسی ایشن نے مطالبہ کیا ہے کہ حکومت فوری طور پر ان شرائط کو واپس لے اور کاروبار دوست پالیسی اپنائے۔ گھی اور کوکنگ آئل کے شعبے میں کسی بھی تعطل کی صورت میں نہ صرف مہنگائی میں اضافہ ہوگا بلکہ سپلائی چین بھی متاثر ہو گی جس کے اثرات براہ راست عام صارفین تک پہنچیں گے۔