ہیلمٹ اور سیٹ بیلٹ کی خلاف ورزی پر سخت کارروائیاں، لاکھوں چالان جاری

جمعرات 17 جولائی 2025 22:32

لاہور (اُردو پوائنٹ اخبارتازہ ترین - آن لائن۔ 17 جولائی2025ء) وزیر اعلیٰ پنجاب کے ویژن کے مطابق ٹریفک قوانین کی پاسداری کو یقینی بنانے کے لیے صوبہ بھر میں ڈی آئی جی ٹریفک محمد وقاص نذیر کی ہدایت پر سخت کارروائیاں جاری ہیں۔ ترجمان کے مطابق رواں سال ہیلمٹ نہ پہننے پر 4 لاکھ 82 ہزار سے زائد شہریوں کو چالان ٹکٹ جاری کیے گئے۔صرف لاہور میں ہی ایک لاکھ 20 ہزار سے زائد موٹر سائیکل سواروں کو ہیلمٹ کی خلاف ورزی پر چالان کیا گیا۔

جبکہ صوبہ بھر میں بغیر سیٹ بیلٹ گاڑی چلانے پر 1 لاکھ 74 ہزار سے زائد چالان جاری کیے گئے۔ سال 2025 میں سیٹ بیلٹ کی خلاف ورزیوں پر گزشتہ سال کی نسبت 638 فیصد زیادہ کارروائیاں کی گئیں۔ڈی آئی جی ٹریفک محمد وقاص نذیر نے کہا کہ ٹریفک قوانین پر عملدرآمد کا مقصد چالان کرنا نہیں بلکہ قیمتی جانوں کا تحفظ ہے۔

(جاری ہے)

انہوں نے کہا کہ حادثے کی صورت میں ہیلمٹ ہیڈ انجری سے بچاتا ہے جبکہ سیٹ بیلٹ کا استعمال زندگی کو محفوظ بناتا ہے۔

وقاص نذیر نے تمام ڈرائیورز اور مسافروں سے اپیل کی کہ گاڑی میں سوار تمام افراد لازمی سیٹ بیلٹ باندھیں۔ڈی آئی جی نے مزید کہا کہ روڈ سیفٹی کمپینز پنجاب کے تمام اضلاع اور تحصیلوں میں جاری ہیں اور شہریوں کو ٹریفک قوانین کے متعلق آگاہی فراہم کی جا رہی ہے۔ انہوں نے کہا کہ ٹریفک قوانین پر عمل پیرا ہو کر ہم اپنی اور دوسروں کی جان کو محفوظ بنا سکتے ہیں۔