Live Updates

طوفانی بارشیں اور سیلابی صورتحال، پنجاب میں دریاؤں اور جھیلوں میں نہانے اور کشتی رانی پر پابندی

ڈیموں، دریاؤں، نہروں، تالابوں، جھیلوں اور ڈسٹری بیوٹریز میں بلااجازت کشتی رانی کی بھی ممانعت ہوگی

جمعرات 17 جولائی 2025 19:50

لاہور /راولپنڈی(اُردو پوائنٹ اخبارتازہ ترین - این این آئی۔ 17 جولائی2025ء)طوفانی بارشوں اور سیلابی صورتحال کے پیش نظر پنجاب بھر میں دفعہ 144 نافذ کرتے ہوئے ڈیموں، دریاؤں، نہروں، تالابوں اور جھیلوں میں ہر قسم کی تیراکی پر پابندی عائد کر دی گئی۔ترجمان محکمہ داخلہ پنجاب نے بتایا کہ صوبے بھر میں دفعہ 144 کا نوٹیفکیشن جاری کردیا گیا ہے جس کے مطابق ڈیموں، دریاؤں، نہروں، تالابوں اور جھیلوں میں ہر قسم کی تیراکی پر پابندی عائد کردی گئی ہے۔

نوٹیفکیشن کے تحت گلیوں، سڑکوں، کھلی جگہوں یا عوامی مقامات پر بارش کے جمع شدہ پانی میں نہانے پر بھی پابندی عائد کردی گئی ہے۔ڈیموں، دریاؤں، نہروں، تالابوں، جھیلوں اور ڈسٹری بیوٹریز میں بلااجازت کشتی رانی کی بھی ممانعت ہوگی۔

(جاری ہے)

نوٹیفکیشن کے مطابق پنجاب میں دفعہ 144 کے تحت تمام پابندیوں کا اطلاق 30 اگست تک ہوگا۔پابندی موجودہ موسمی حالات کے تناظر میں قیمتی انسانی جانوں کی حفاظت کیلئے لگائی گئی ہے، مون سون میں شدید بارشوں کے دوران نشیبی علاقوں، گلیوں اور کھلی جگہوں پر بارش کے پانی کے جمع ہونے میں خاطر خواہ اضافہ ہو اہے۔

نوٹیفکیشن میں کہا گیا کہ پنجاب بھر کے ڈیموں، دریاؤں، نہروں، تالابوں اور جھیلوں میں ان دنوں پانی کی سطح بلند ہے، ایسی صورتحال میں تیراکی اور کشتی رانی انسانی زندگی کیلئے انتہائی خطرناک ہے۔صوبائی محکمہ داخلہ کی جانب سے ہدایت کی گئی ہے کہ انتظامیہ اور قانون نافذ کرنے والے ادارے حکم نامے پر عملدرآمد یقینی بنائیں۔ترجمان محکمہ داخلہ پنجاب کے مطابق عوامی آگاہی کیلئے دفعہ 144 کے نفاذ کی بھرپور تشہیر کی ہدایت کی گئی ہے۔