وزیر اعلیٰ بلوچستان سرفراز بگٹی کی وزارت ''میری ٹائم افیئرز'' کے اجلاس میں ویڈیو لنک کے ذریعے شرکت

کوئٹہ (اُردو پوائنٹ اخبارتازہ ترین - اے پی پی۔ 17 جولائی2025ء) وزیر اعلیٰ بلوچستان میر سرفراز بگٹی نے جمعرات کو وفاقی وزارت ''میری ٹائم افیئرز'' کے اجلاس میں ویڈیو لنک کے ذریعے شرکت کی اجلاس میں گوادر کی ترقی، عوامی سہولیات، اور نوجوانوں کے لیے روزگار کے مواقع بڑھانے سے متعلق اہم معاملات زیر بحث آئے اجلاس سے خطاب کرتے ہوئے وزیر اعلیٰ نے کہا کہ گوادر سے عمان تک فیری سروس شروع کرنے پر سنجیدگی سے غور کیا جا رہا ہے جس سے نہ صرف زائرین بلکہ مقامی آبادی کو بھی آمد و رفت میں سہولت حاصل ہوگی انہوں نے اس منصوبے میں بلوچستان حکومت کی جانب سے مکمل تعاون کی یقین دہانی کرواتے ہوئے کہا کہ یہ اقدام علاقائی روابط کو مضبوط بنانے میں سنگ میل ثابت ہوگا وزیر اعلیٰ نے گوادر شہر میں گوادر پورٹ اتھارٹی کے تحت قائم کردہ واٹر پلانٹ کو خوش آئند قرار دیتے ہوئے کہا کہ اس منصوبے کے ذریعے روزانہ 1.2 ملین گیلن پینے کا صاف پانی شہریوں کو میسر آئے گا جو طویل عرصے سے درپیش پانی کے مسئلے کے دیرپا حل کی طرف اہم قدم ہے وزیر اعلیٰ بلوچستان نے کہا کہ حکومت نوجوانوں کو عالمی معیار کی تربیت فراہم کرنے کے لیے پرعزم ہے پاک چائنہ ٹیکنیکل ووکیشنل سینٹر کی معاونت سے نوجوانوں کو مختلف ہنر سکھائیں گے اور بلوچستان حکومت نے تیس ہزار نوجوانوں کو ہنر مند بناکر کر انہیں بیرون ملک روزگار کی فراہمی کا جو پروگرام شروع کیا ہے پاک چائنہ ٹیکنیکل ووکیشنل سینٹر ان اہداف کے حصول میں معاون ثابت ہوگا انہوں نے کہا کہ بلوچستان کے نوجوانوں کو باعزت روزگار دیکر بااختیار بنانا صوبے کے خوشحال مستقبل کی ضمانت ہے گوادر پورٹ کی مکمل فعالیت کے حوالے سے وزیر اعلیٰ نے واضح کیا کہ حکومت بلوچستان ہر سطح پر تعاون اور معاونت فراہم کرے گی انہوں نے کہا کہ گوادر پورٹ اتھارٹی کے تمام مجوزہ ترقیاتی منصوبوں کو بھرپور سپورٹ دی جائے گی تاکہ گوادر کی بندرگاہ ملکی معیشت میں مرکزی کردار ادا کر سکے وزیر اعلیٰ میر سرفراز بگٹی نے کہا کہ گوادر کی ترقی درحقیقت بلوچستان کی ترقی ہے اور اس مقصد کے حصول کے لیے تمام ممکنہ وسائل اور اقدامات بروئے کار لائے جا رہے ہیں