وزیر اعلیٰ پنجاب کی ہدایات کے پیشِ نظر پی ڈی ایم اے کی مون سون الرٹ فیکٹ شیٹ جاری

لاہور (اُردو پوائنٹ اخبارتازہ ترین - اے پی پی۔ 18 جولائی2025ء) وزیر اعلیٰ پنجاب مریم نواز کی ہدایات کے پیشِ نظر پی ڈی ایم اے کی مون سون الرٹ فیکٹ شیٹ جاری ، فیکٹ شیٹ میں مون سون بارشوں کی صورتحال، پنجاب کے دریائوں، بیراجز اور ڈیمز میں پانی کی سطح بارے اعداد و شمار شامل کیے گئے ہیں، مون سون بارشوں سے ہونے والے نقصانات بارے اعدادوشمار بھی فیکٹ شیٹ میں شامل کیے گئے۔

ترجمان کے مطابق گزشتہ 24 گھنٹوں میں راولپنڈی ، منڈی بہائوالدین ، چکوال ، جہلم، اوکاڑہ، منگلا مری، لاہور اور شیخوپورہ میں بارش ریکارڈ کی گئی۔ رواں سال مون سون بارشوں کے باعث 113 شہری جاںبحق ،128 گھر متاثر اور 398 شہری زخمی ہوئے، زیادہ اموات کچے مکانات،خستہ عمارتوں و چھتوں کے گرنے کے باعث ہوئیں۔ ڈائریکٹر جنرل پی ڈی ایم اے عرفان علی کاٹھیا کا کہنا ہے کہ حکومتی ہدایات کے مطابق سوگوار خاندانوں کی مالی معاونت کی جائے گی، پنجاب کے بیشتر دریائوں اور بیراجز میں پانی کا بہائو نارمل سطح پر ہے۔

(جاری ہے)

منگلا ڈیم میں 47 فیصد ،تربیلا میں 79 فیصد پانی موجود ہے۔ دریائے جہلم میں رسول بیراج کے مقام پر درمیانے درجے کے سیلاب کا خدشہ ہے، دریائے سندھ میں تربیلا کے مقام پر پر نچلے درجے کی سیلابی صورتحال جبکہ ممکنہ سیلابی خطرے کے پیشِ نظر پی ڈی ایم اے کے انتظامات مکمل ہیں۔انہوں نے کہاکہ لاہور، سیالکوٹ، فیصل آباد اور گوجرانولہ میں مون سون بارشوں سے اربن فلڈنگ کا خدشہ ہے، بڑے شہروں کی انتظامیہ ہنگامی صورتحال کے پیش نظر الرٹ رہے، پی ڈی ایم اے کنٹرول روم اور ڈسٹرکٹ ایمرجنسی آپریشن سنٹرز 24/7 صورتحال کو مانیٹر کر رہے ہیں۔

ڈی جی پی ڈی ایم اے نے مزید ممکنہ بارشوں کے پیش نظر واسا و انتظامیہ کو نشیبی علاقوں سے پانی کی نکاسی یقینی بنانے کی ہدایات جاری کیں۔ان کا مزید کہنا تھا کہ حکومت پنجاب کی جانب سے دریائوں ،نہروں اور برساتی نالوں میں نہانے پر مکمل پابندی عائد ہے، خلاف ورزی کی صورت میں سخت ایکشن لیا جائے گا، شہری خراب موسم میں غیر ضروری سفر سے گریز اور بجلی کی تاروں و کھمبوں سے دور رہیں، مخدوش و بوسیدہ مکانات میں ہرگز رہائش نہ رکھیں جبکہ ہنگامی صورتحال میں پی ڈی ایم اے ہیلپ لائن 1129 پر کال کریں۔