سعودی ولی عہد سے شامی صدر کا ٹیلی فونک رابطہ، باہمی دلچسپی کے امور بارے تبادلہ خیال کیا

جمعہ 18 جولائی 2025 10:00

ریاض (اُردو پوائنٹ اخبارتازہ ترین - اے پی پی۔ 18 جولائی2025ء) سعودی عرب کے ولی عہد و وزیراعظم شہزادہ محمد بن سلمان سے شام کے صدر احمد الشرع نے ٹیلی فونک رابطہ کیا اور باہمی دلچسپی کے امور بارے تبادلہ خیال کیا۔

(جاری ہے)

سعودی خبر رساں ا دارے (ایس پی اے)کے مطابق گفتگو کے دوران شہزادہ محمد بن سلمان نے اس عزم کا اعادہ کیا کہ شام کی وحدت وسالمیت اور قومی یکجہتی کے تحفظ کے لیے باہمی اتحاد اور ہم آہنگی کو فروغ دینا ضروری ہے جو ملک کے امن و استحکام کو یقینی بنانے کے لیے اہم ہے۔

ولی عہد نے جمہوریہ شام پر اسرائیلی حملوں کی مذمت کرتے ہوئے اس حوالے سے مملکت کے موقف کا اعادہ کیا۔ انہوں نے اس بات پر بھی زور دیا کہ عالمی برادری شامی حکومت کو درپیش چیلنجز سے نمنٹے کے لیے اس کی حمایت اور کسی بھی بیرونی مداخلت کو روکنے کے لیے موثر کردار ادا کرے۔دوسری جانب شامی صدر احمد الشرع نے سعودی عرب کی طرف سے شام کی حمایت پرشکریہ ادا کرتے ہوئے ولی عہد کی جانب سے شام اور خطے میں امن و استحکام کے لیے کی جانے والی کوششوں کو سراہا۔