بھارتی فضائیہ کی ناکامی پر مودی سرکار کی پردہ پوشی بے نقاب ہوگئی

رافیل طیارے سپیکٹرا وار سسٹم کے باوجود پاکستانی میزائلوں کو روک نہ سکے، بھارتی طیاروں پر نہ میٹیور میزائل نصب تھے نہ جدید سافٹ ویئر اور نہ الیکٹرانک جمنگ سسٹم کی تنصیب ہوئی؛ دی اکانومسٹ کی رپورٹ

ساجد علی ہفتہ 19 جولائی 2025 11:54

بھارتی فضائیہ کی ناکامی پر مودی سرکار کی پردہ پوشی بے نقاب ہوگئی

نئی دہلی ( اُردو پوائنٹ اخبارتازہ ترین۔ 19 جولائی 2025ء ) پاکستان کے ساتھ کشیدگی کے دوران بھارتی فضائیہ کی ناکامی پر مودی سرکار کی پردہ پوشی ایک بار پھر بے نقاب ہوگئی۔ تفصیلات کے مطابق عالمی جریدے دی اکانومسٹ کی رپورٹ میں بھارتی فضائیہ کی ناکامی سے متعلق مودی سرکار کی پردہ پوشی آشکار ہوئی ہے، جس کی وجہ سے معرکہ حق کے دوران پاکستان کے ہاتھوں جدید طیارے گنوا کر بھارت کو عالمی سطح پر پھر سے شرمندگی کا سامنا کرنا پڑا کیوں کہ برطانوی جریدے دی اکانومسٹ کی رپورٹ میں بھارتی فضائیہ کی عبرتناک ناکامی کی قعلی کھل گئی، رپورٹ نے مودی حکومت کی پردہ پوشی اور بھارتی فضائیہ کی جنگی حماقتوں کو بے نقاب کیا۔

دی اکانومسٹ کی رپورٹ میں کہا گیا ہے کہ بھارت کے کم از کم پانچ طیارے تباہ ہوئے جن میں مہنگے رافیل بھی شامل تھے، بھارتی چیف آف ڈیفنس جنرل انیل چوہان نے اعتراف کیا کہ جنگی غلطیوں سے طیارے کھوئے، بھارتی دفاعی اتاشی کیپٹن شیو کمار نے تسلیم کیا کہ سیاسی قیادت نے پاکستانی فوجی تنصیبات پر حملے کی اجازت نہ دی، بھارتی رافیل طیارے سپیکٹرا وار سسٹم کے باوجود پاکستانی میزائلوں کو روک نہ سکے۔

(جاری ہے)

دی اکانومسٹ کی رپورٹ سے معلوم ہوا ہے کہ بھارتی طیاروں پر نہ میٹیور میزائل نصب تھے نہ جدید سافٹ ویئر اور الیکٹرانک جمنگ سسٹم لگائے گئے، بھارت میں رافیل طیارے کی ناکامی پر فوجی حلقوں میں داسوٹ کمپنی پر تنقید کی گئی اور سافٹ ویئر شیئر نہ کرنے کا الزام لگایا گیا جب کہ چین نے پاکستان کو جدید ٹیکنالوجی کے ساتھ ساتھ رئیل ٹائم ٹارگٹنگ ڈیٹا بھی فراہم کیا۔

بتایا جارہا ہے کہ بھارتی ریاست پنجاب کے علاقے اکالیا کلان (بھٹنڈا) میں بھارتی طیارے کا ملبہ گرا مگر متاثرہ خاندان آج بھی معاوضے کے منتظر ہے، مودی سرکار کی ناکامی پر بھارت میں آئندہ 114 طیارے خریدنے کی ڈیل پر سوالات اٹھنے لگے، بھارتی اپوزیشن کا الزام ہے کہ مودی سرکار ناکامی چھپانے کے لیے پارلیمنٹ کا خصوصی اجلاس بلانے سے قاصر ہے۔