ایس آئی ایف سی کے تعاون سے پاک ترک تجارتی تعاون میں نئی پیش رفت

سالانہ 5ارب ڈالر کے دو طرفہ تجارتی ہدف کے حصول کیلئے واضح اہداف مقرر کردیئے گئے حکومت ، ایس آئی ایف سی پاکستان اور ترکی کے درمیان اقتصادی تعلقات مزید مضبوط بنانے کیلئے پرعزم ،رپورت

ہفتہ 19 جولائی 2025 17:36

ایس آئی ایف سی کے تعاون سے پاک ترک تجارتی تعاون میں نئی پیش رفت

اسلام آباد(اُردو پوائنٹ اخبارتازہ ترین - این این آئی۔ 19 جولائی2025ء)اسپیشل انویسٹمنٹ فیسلٹی کونسل کے تعاون سے پاکستان اور ترکی کے مابین تجارتی تعاون میں نئی پیش رفت ہوئی ہے۔رپور ٹ کے مطابق ایس آئی ایف سی کی بھرپور معاونت سے حکومت کے معاشی بحالی کیلئے اقدامات میں تیزی آ رہی ہے، جس کے تحت ترکی کے ساتھ سالانہ 5ارب ڈالر کے دو طرفہ تجارتی ہدف کے حصول کیلئے واضح اہداف مقرر کیے گئے ۔

اسی تسلسل میں اسلام آباد-استنبول ریل منصوبے کو تیزی سے مکمل کرنے کیلئے اقدامات جاری ہیں۔

(جاری ہے)

2023 سے اشیا کی تجارت کے معاہدے کے تحت پاکستان کو ترکی کی مارکیٹ میں ترجیحی رسائی حاصل ہے ۔اس معاہدے کی بدولت پاکستان کو 261ٹیرف لائنز جب کہ ترکی کو 130اشیا پر رعایت حاصل ہے۔ پاکستان کو ترکی کی منڈی میں ترجیحی رسائی حاصل ہونے سے برآمدات میں نمایاں اضافہ متوقع ہے۔

ترکی سے اقتصادی تعلقات مزید مضبوط بنانے کیلئے ہوائی اڈوں، صحت اور ڈیجیٹل نظام میں معاہدوں پر بھی غور کیا جا رہا ہے، اسی طرح شپ بریکنگ صنعت میں ترک کمپنیوں سے اشتراک بڑھانے اور سمندر و زمین میں وسائل کی تلاش کی ہدایات جاری کی گئی ہیں۔حکومت اور ایس آئی ایف سی پاکستان اور ترکی کے درمیان اقتصادی تعلقات مزید مضبوط بنانے کیلئے پرعزم ہیں۔