ڈپٹی کمشنر سیالکوٹ کی زیر صدارت بزنس فیسلی ٹیشن سینٹر کا سہ ماہی کارکردگی کے جائزہ بارے اجلاس

ہفتہ 19 جولائی 2025 17:41

سیالکوٹ (اُردو پوائنٹ اخبارتازہ ترین - اے پی پی۔ 19 جولائی2025ء) ڈپٹی کمشنر سیالکوٹ صبا اصغر علی کی زیر صدارت بزنس فیسلی ٹیشن سینٹر سیالکوٹ کا سہ ماہی کارکردگی کے جائزہ بارے اجلاس ڈی سی آفس کانفرنس روم میں منعقد ہوا۔ اجلاس میں ایڈیشنل ڈپٹی کمشنر (جنرل) سید ایوب بخاری، نائب صدر سیالکوٹ چیمبر آف کامرس اینڈ انڈسٹری عمر خالد اور منیجر بی ایف سی طلحہ سلہریا اور مرکز سے منسلک 33 محکموں کے نمائندوں نے شرکت کی۔

ڈپٹی کمشنر صبا اصغر علی نے مارچ تا مئی 2025 کی کارکردگی کا جائزہ لیتے ہوئے کہا کہ بزنس فیسلی ٹیشن سینٹر، جو پنجاب بورڈ آف انویسٹمنٹ اینڈ ٹریڈ اور محکمہ صنعت، تجارت و سرمایہ کاری کے اشتراک سے کام کر رہا ہےاورون ونڈو سہولت کے طور پر کاروباری افراد، صنعت کاروں اور شہریوں کو خدمات فراہم کر رہا ہے۔

(جاری ہے)

یہ مرکز 11 جنوری 2024 سے کام کر رہا ہے اور اس کا مقصد کاروباری ترقی کی راہ میں حائل رکاوٹوں کو دور کرتے ہوئے نظام کو موثر بنانا ہے۔

سہ ماہی کے دوران مرکز نے 5,158 رجسٹریشنز، لائسنسز، سرٹیفکیٹس اور دیگر پرمٹس پر مشتمل درخواستوں پر کارروائی کی، جن میں سے 99 فیصد مکمل کی گئیں، جبکہ صرف 34 درخواستیں زیر التوا رہیں۔ مرکز میں 7,516 شہریوں نے خدمات حاصل کیں اور 2,055 مشاورتی سیشنز کا انعقاد ہوا۔ اجلاس میں سب سے زیادہ طلب کی جانے والی خدمات اور مختلف محکموں کی کارکردگی کا ڈیٹا بھی پیش کیا گیا، جس سے مرکز کی صوبائی سطح پر حیثیت واضح ہوتی ہے۔

ڈپٹی کمشنر نے اجلاس سے خطاب کرتے ہوئے کہا کہ آسان کاروبار کے فروغ، صنعتی ترقی اور مجموعی معاشی بہتری کے لیے مرکزِ سہولتِ کاروبار کا کردار نہایت اہم ہے۔ ضلعی انتظامیہ، سیالکوٹ چیمبر آف کامرس اینڈ انڈسٹری کے مشاورتی تعاون سے مرکز کی کارکردگی کو مزید موثر بنانے کے لیے اقدامات کر رہی ہے۔اجلاس کے اختتام پر مختلف محکموں اور افسران میں تعریفی اسناد تقسیم کی گئیں تاکہ سروس ڈیلیوری، عوامی خدمت اور سرمایہ کاری کے فروغ میں کردار ادا کرنے والے افراد کی حوصلہ افزائی کی جا سکے۔